Ռուսաստանի ԱԳՆ-ը մեկնաբանել է ադրբեջանական արտաքին քաղաքական գերատեսչության պատասխանը՝ ազգությամբ հայ ռուսաստանցիների մուտքն Ադրբեջան արգելելու մասին։ ԵԱՏՄ ինստիտուտի տնօրեն Վլադիմիր Լեպեխինը կարծիքով՝ ՌԴ ԱԳՆ-ի հայտարարությունը շատ նորմալ է: Փորձագետի կարծիքով՝ աշխարհում ոչ մի երկիր, այդ թվում Ադրբեջանն իրավունք չունի ցուցումներ տա Ռուսաստանին՝ ինչ անել այս կամ այն ազգության հետ: «Եթե դա չվերաբերեր հայկական կողմին, գուցե ԱԳՆ-ն իր հայտարարություններում այդքան օպերատիվ չլիներ: Բայց, այնուամենայնիվ, մի կողմից ռուս-ադրբեջանական հարաբերություններն են, մյուս կողմից՝ ռուս-հայկական, որոնք գտնվում են ՌԴ-ի ուշադրության կենտրոնում, այդ իսկ պատճառով ԱԳՆ-ը դրան բավական օպերատիվ է արձագանքել՝ ադրբեջանական կողմին ցույց տալով նման հայտարարությունների անթույլատրելիությունը»,- «Ռուսարմինֆո»-ին տված հարցազրույցում ասել է Վլադիմիր Լեպեխինը: Նրա կարծիքով՝ ՌԴ ԱԳՆ-ն այս հարցում ոչ թե կոշտ, այլ հստակ դիրքորոշում է արտահայտել՝ ընդգծելով, որ բավական ուշադիր է հետևում, թե ինչ է տեղի ունենում ինչպես ռուս-ադրբեջանական, այնպես էլ ռուս-հայկական հարաբերություններում: ԵԱՏՄ ինստիտուտի տնօրենը կարծում է նաև, որ երկու երկրների դիվանագիտական մակարդակում միջոցներ կձեռնարկվեն՝ պարզելու, թե այս իրավիճակում ով է ճիշտ, ով՝ սխալ։