Արդեն հայտնել էինք, որ այսօր ժամը 10.20-ի սահմաններում, կորել է կապը ամենօրյա մարտական պատրաստության պլանով ուսումնամարզական թռիչք իրականացնող ՀՀ զինված ուժերի ՍՈՒ-25 մարտական ինքնաթիռի հետ: Aurora Media-ի լրատվական թողարկման ժամանակ ՀՀ ՊՆ մամուլի խոսնակ Արծրուն Հովհաննիսյանը հայտնեց, որ այն պատկանում է ՀՀ պաշտպանության նախարարությանը, իսկ թռիչքի պահին ինքնաթիռում եղել է 2 օդաչու։ Shamshyan.com-ը հաղորդում է, որ Սու-25 մարտական ինքնաթիռը հայտնաբերվել է Մարալիկի Բարձրաշեն գյուղի վարչական տարածքում գտնվող ձորում: Aurora News-ի հետ զրույցում ՀՀ ՊՆ մամուլի խոսնակ Արծրուն Հովհաննիսյանը պաշտոնապես չհաստատեց տեղեկությունը՝ նշելով, որ դրանք ընդամենը խոսակցություններ են։ SHANTNEWS.am-ի տեղեկություններով էլ՝ ինքնաթիռ է ընկել Անիի տարածաշրջանի գյուղերի մերձակայքում: Օդանավում գտնվել է 2 անձ՝ մեկը փոխգնդապետ, մյուսը՝ 28-ամյա երիտասարդ: Ավելի ուշ Արթիկի տարածաշրջանի Փանիկ գյուղից տեղեկություն է հաղորդվել, որ ուսումնական ինքնաթիռն ընկել է Փանիկ գյուղի տարածքում, սակայն գյուղապետ Վարդան Մաքեյանը հայտնել է, որ գյուղի տարածքում՝ սարերի մոտ, ոչինչ չի հայտնաբերվել: Ինքնաթիռի կապը կորելու վերաբերյալ այլ մանրամասներ այս պահի դրությամբ հայտնի չեն։ ՀՀ ՊՆ խոսնակ Արծրուն Հովհաննիսյանն էլ լրատվականի հետ զրոյցում նշել է, որ թռիչքի ընթացքում ուսումնական կենտրոնի հետ կապը կորցրած ինքնաթիռի ու նրա երկու օդաչուների որոնմանը մասնակցում են և՛ ուղղաթիռով, և՛ հետիոտն փրկարարների խմբերով։ Նա տեղեկացրել է, որ մոտավոր գիտեն, թե որտեղ պետք է փնտրել ինքնաթիռը․ դա Մարալիկի մոտակայքն է, որտեղ էլ կատարվում են որոնումները։ Իքնաթիռը Սու-25ՈւԲ ուսումնական տիպի ինքնաթիռ է, և վթարի դեպքում օդաչուները կարող էին դրանից դուրս ցատկել պարաշյուտների միջոցով։