Սիմոնյանը կվճարի ուկրաինական ԱԹՍ-ի ուղղությամբ կրակած ֆերմերի տուգանքը

RT-ի գլխավոր խմբագիր Մարգարիտա Սիմոնյանը հայտարարել է, որ կվճարի Վոլգոգրադի մարզի ֆերմերի նկատմամբ նշանակված տուգանքը, որը որսորդական հրացանով փորձել էր խոցել ուկրաինական անօդաչու թռչող սարք։

Խոսքը 66-ամյա Նիկոլայ Մուխինի մասին է։ RT-ի հաղորդմամբ՝ տղամարդը տուգանվել է 40 հազար ռուբլով, իսկ նրա հրացանը բռնագրավվել է այն բանից հետո, երբ նա կրակել է իր տան վրայով թռչող ԱԹՍ-ի ուղղությամբ։ Ֆերմերը մտադիր է բողոքարկել դատարանի որոշումը։

Սիմոնյանը պատասխանատու մարմիններին կոչ է արել մշակել նման իրավիճակներում քաղաքացիների գործողությունների կանոններ։

«Մենք չունենք կանոններ, թե ինչ անել նման իրավիճակներում։ Ուրեմն պետք է դրանք մշակել։ Եկեք շտկենք։ Իսկ ես մինչ այդ կվճարեմ ֆերմերի այս տուգանքը»,- գրել է նա Telegram-ում։

Օգոստոսի 19-ին ՌԴ պաշտպանության նախարարությունը հայտնել էր, որ ռուսական հակաօդային պաշտպանության միջոցները ցերեկվա ընթացքում ոչնչացրել են Ուկրաինայի զինված ուժերի 438 անօդաչու թռչող սարք։