Պուտինը նոր նշանակումներ է կատարել ՌԴ պաշտպանության նախարարությունում

ՌԴ նախագահ Վլադիմիր Պուտինը հանդիպում է անցկացրել պաշտպանության նախարարության ղեկավարության հետ, որի ընթացքում հայտարարել է ռազմական կառավարման համակարգում մի շարք կադրային փոփոխությունների մասին։

Պուտինը հայտնել է, որ պաշտպանության նախարարությունում մեկ ղեկավարության ներքո են կենտրոնացվում թիկունքի բոլոր ծառայությունները, իսկ պաշտպանության նախարարի տեղակալի պաշտոնում նշանակվել է Վալերի Սոլոդչուկը։

Նա նաև հայտարարել է, որ «Կենտրոն» զորախմբի հրամանատար է նշանակվել Անդրեյ Իվանաևը, իսկ «Արևելք» զորախմբի ժամանակավոր հրամանատար՝ այդ զորախմբի շտաբի պետ Պյոտր Բոլգարյովը։

Բացի այդ, Պուտինը հիշեցրել է, որ Ռուսաստանում ստեղծվում է անօդաչու համակարգերի նոր զորատեսակ, որի ձևավորումը վստահվել է Դենիս Լյամինին։

ՌԴ նախագահը նշել է, որ պաշտպանության նախարարության կառուցվածքային փոփոխությունները պայմանավորված են Ուկրաինայում ընթացող պատերազմի ընթացքում կուտակված փորձով և գործող բանակի կարիքներով։