Կառավարությունը 6 ամսով արգելել է տոմատի մածուկի ներմուծումը

ՀՀ կառավարությունը հաստատել է որոշում, որով 2026 թվականի օգոստոսի 3-ից 6 ամիս ժամկետով կսահմանվի տոմատի մածուկի ներմուծման ժամանակավոր արգելք։ Խոսքը վերաբերում է ԵԱՏՄ ԱՏԳ ԱԱ 2002 90 ծածկագրին դասվող ապրանքատեսակներին, այդ թվում՝ Եվրասիական տնտեսական միության երկրներից Հայաստան տեղափոխվող արտադրանքին։

Կառավարության հիմնավորմամբ՝ որոշման նպատակն է ապահովել հավասար մրցակցային պայմաններ տոմատի մածուկ ներմուծողների և տեղական հումքով արտադրող ընկերությունների համար, ինչպես նաև կարգավորել լոլիկի մթերման գործընթացը։

Նշվում է, որ ներմուծվող տոմատի մածուկի մեծ ծավալները և տեղական արտադրանքի իրացման ու արտահանման դժվարությունները հանգեցրել են լոլիկի մթերման պահանջարկի նվազմանը, շուկայի անհավասարակշռությանը և խնդիրներ են ստեղծել գյուղատնտեսական արտադրողների համար։