Հայկական գինու արտահանման շուրջ 70%-ը բաժին է ընկնում ԵԱՏՄ երկրներին

Ռուսական «ՌԻԱ Նովոստի» գործակալությունը հրապարակել էր տվյալներ, ըստ որոնց՝ հայկական գինու արտահանման շուրջ 70%-ը բաժին է ընկնում Եվրասիական տնտեսական միության (ԵԱՏՄ) երկրներին, հիմնականում՝ Ռուսաստանին։

Auroranews-ը ճշտել է հրապարակված տեղեկությունը և պարզել, որ տվյալները համապատասխանում են իրականությանը։ Հայկական գինու արտահանման զգալի մասը իսկապես ուղղվում է ԵԱՏՄ երկրներին, մասնավորապես` Ռուսաստանին:

2025 թվականի տվյալներով՝ հայկական ընկերությունները արտահանել են 18,7 մլն դոլարի գինի։ Դրանցից 12,8 մլն դոլարի արտադրանքը մատակարարվել է Ռուսաստան։ Ընդհանուր առմամբ ԵԱՏՄ երկրներին բաժին է ընկել մոտ 13 մլն դոլարի հայկական գինի՝ արտահանման ընդհանուր ծավալի շուրջ 69,6%-ը։

Auroranews-ը մեկնաբանություն ստանալու նպատակով կապ է հաստատել ՀՀ էկոնոմիկայի նախարարության մամուլի խոսնակի հետ։ Նա նշել է, որ հարցը նախարարության լիազորությունների շրջանակում չէ և առաջարկել է դիմել ՀՀ արտաքին գործերի նախարարություն։ Իսկ ԱԳՆ-ից մեր զանգերին չպատասխանեցին:

Հավելենք, որ ԵԱՏՄ-ից դուրս հայկական գինու խոշոր ներկրողներից են ԱՄՆ-ն և Կյուրասաոն։