Իսպանիա է ներխուժել 49 հազար անօրինական միգրանտ. Իսպանիայի ՆԳՆ

Մեկ օրվա ընթացքում շուրջ 49 հազար միգրանտ է ներխուժել Աֆրիկայի ափին գտնվող և Մարոկկոյին սահմանակից իսպանական ինքնավար Սեուտա քաղաք։ Այս մասին հուլիսի 31-ին հայտնել է Reuters-ը՝ հղում անելով Իսպանիայի ներքին գործերի նախարարությանը։

Իտալիայի վարչապետ Ջորջա Մելոնին X սոցիալական ցանցում հայտարարել է, որ Սեուտայից ստացվող կադրերը ցնցող են և ևս մեկ անգամ ապացուցում են, որ անվերահսկելի անօրինական ներգաղթն իրական սպառնալիք է Եվրոպայի սահմանների անվտանգության համար։

Նրա խոսքով՝ Հռոմը պատրաստ է սահմանների և քաղաքացիների անվտանգությունը պաշտպանելու միջոցներ ձեռնարկել, այդ թվում՝ կասեցնել Իսպանիայի հետ Շենգենյան համաձայնագրի գործողությունը։

«Անօրինական ներգաղթի հարցում ոչ մի քայլ չենք նահանջի։ Սահմանների պաշտպանությունը, մարդկանց վաճառքով զբաղվողների գործունեության կանխումը և միգրանտների վերադարձն իրենց երկրներ շարունակելու են մնալ կառավարության առաջնահերթությունները»,- ընդգծել է Մելոնին։

Իտալիայի արտգործնախարար Անտոնիո Տայանին նույնպես աջակցել է Իսպանիայի հետ Շենգենյան տարածքը փակելու նախաձեռնությանը՝ անօրինական և անվերահսկելի ներգաղթը որակելով ազգային անվտանգության սպառնալիք։

Նա քննադատել է նաև Իսպանիայի կառավարության՝ երկրում անօրինական բնակվող ավելի քան 500 հազար միգրանտի օրինականացնելու որոշումը՝ այն անվանելով «խորապես սխալ»։

Իսպանիայի արտգործնախարար Խոսե Մանուել Ալբարեսը Տայանիի հայտարարությունն անվանել է գործընկեր և բարեկամ երկրի արտգործնախարարին ոչ վայել խոսք՝ ընդգծելով, որ Մադրիդն ակնկալում է եվրոպական համերաշխություն, ոչ թե կուսակցական դեմագոգիա։ Նա հայտարարել է, որ Իտալիայի դեսպանին կանչել է ԱԳՆ։

Իսպանական ընդդիմադիր Ժողովրդական կուսակցության առաջնորդ Ալբերտո Նունյես Ֆեյխոոն Սեուտայում ստեղծված իրավիճակն անվանել է ազգային անվտանգության ճգնաժամ։ Ծայրահեղ աջ «Վոքս» կուսակցության առաջնորդ Սանտյագո Աբասկալը միգրանտների զանգվածային հոսքի համար անձամբ մեղադրել է վարչապետ Պեդրո Սանչեսին։

Սանչեսը հայտարարել է, որ կառավարությունը մոբիլիզացրել է բոլոր անհրաժեշտ միջոցները՝ իրավիճակին անհապաղ արձագանքելու համար։ Նա նաև մեկնել է Սեուտա, իսկ երկրի ՆԳՆ-ն հայտարարել է քաղաքում անվտանգությունն ապահովելու նպատակով զինծառայողներ տեղափոխելու մասին։

Սեուտայի ղեկավար Խուան Խեսուս Վիվասը հայտարարել է, որ քաղաքում հումանիտար և սոցիալական արտակարգ իրավիճակ է ստեղծվել։

Իսպանիայի քաղաքացիական գվարդիայի տվյալներով՝ առնվազն 18 մարդ է զոհվել՝ լողալով իսպանական տարածք հասնելու փորձի ժամանակ։ AFP-ի հաղորդմամբ՝ սա 2021 թվականից ի վեր միգրանտների ամենազանգվածային հոսքն է դեպի Սեուտա։ Այդ տարի քաղաք էր փորձել ներթափանցել ավելի քան 10 հազար անօրինական միգրանտ։

Սեուտա և Մելիլյա իսպանական քաղաք-էքսկլավներով անցնող երթուղին աֆրիկացիների՝ Արևմտյան Եվրոպա հասնելու հիմնական ճանապարհներից մեկն է։ Շատ միգրանտների համար Մարոկկոն Եվրոպա տանող տարանցիկ երկիր է։