Գևորգ Պապոյանը նշանակվել է «Արարատցեմենտի» նոր կառավարիչ-տնօրենին

Էկոնոմիկայի նախարար Գևորգ Պապոյանը Դավիթ Գևորգյանին նշանակել է «Արարատցեմենտ» ՓԲԸ-ի կառավարիչ-տնօրեն։

Գևորգյանը մինչև այս պահը վարչապետի օգնականն էր։ 2018–21թթ եղել է Արագածոտնի մարզպետը, դրանից առաջ մի քանի ամիս` ՏԿԵ փոխնախարար։

Այսօր առավոտյան՝ կառավարության նիստից հետո, Պապոյանը հայտարարել էր, որ պատրաստվում է գնալ ընկերություն և կատարել տնօրենի նշանակումը։

«Այստեղ օրենսդրությունն այլ կարգավորում է նախատեսում։ Կառավարումն ամբողջությամբ անցել է Էկոնոմիկայի նախարարությանը, և տնօրենը լինելու է նախարարության աշխատակից»,- նշել էր նա։

Նախարարի խոսքով՝ մյուս հիմնարկների մասով ևս որոշումներ կկայացվեն։

«Հավաստիացնում եմ՝ մենք պակաս շահագրգռված չենք, որ տնտեսական ակտիվներն ամբողջությամբ աշխատեն։ «Նոյը» կվերաբացվի։ Քննարկեցինք նաև խաղողի մթերման հարցը, քանի որ եթե գործարանը չաշխատի, մթերումների հետ կապված խնդիրներ կառաջանան»,- ասել էր Պապոյանը։

Հիշեցնենք՝ ավելի վաղ նա հայտնել էր, որ «Արարատցեմենտի» կառավարիչը կնշանակվի հուլիսին։

«Մինչ այդ ընկերության բոլոր աշխատակիցներին հորդորում եմ բարեխղճորեն և պատասխանատվությամբ կատարել իրենց աշխատանքը, որպեսզի հետագայում չառաջանան օրենքով սահմանված կարգով աշխատանքից ազատման կամ վարչական ու քրեական պատասխանատվության ենթարկման հիմքեր»,- գրել էր նախարարը։