Թրամփը պետք է ազդի Ալիևի վրա. ամերիկացի փորձագետը՝ հայ գերիների մասին. The Washington Times

ԱՄՆ նախագահ Դոնալդ Թրամփը պետք է համոզի Ադրբեջանի նախագահ Իլհամ Ալիևին ազատ արձակել 19 հայ գերիներին։ Այս մասին ասված է քաղաքական ռիսկերի և միջազգային առևտրի հարցերով ամերիկացի փորձագետ Դարրեն Սփինքի հոդվածում, որը հրապարակվել է «The Washington Times»-ում։

Հոդվածի հեղինակի կարծիքով՝ գերիների ազատ արձակումը Հայաստանի իշխանություններին կդրդեր առաջ մղել խաղաղության համաձայնագիրը։

Փորձագետը համոզված է, որ հայերը խաղաղության պայմանագիրը վերջնական չեն համարի, քանի դեռ հարազատները սպասում են գերիներին։

Ինչպես նշել է Սփինքը, ԱՄՆ դաշնակիցներն ու գործընկերները, այդ թվում՝ Կանադան և Ֆրանսիան, նույնպես բարձրացրել են այս հարցը և պահանջել ազատ արձակել Բաքվում պահվող հայերին։ Նա մասնավորապես մեջբերել է եվրոպացի բարձրաստիճան պաշտոնյաների հայտարարությունները, որոնք նշել են, թե գերիներին ազատ արձակելը բարի կամքի դրսևորում կլիներ և կնպաստեր կայուն խաղաղությանը։

Հոդվածի հեղինակի կարծիքով՝ Թրամփն ազդեցության որոշակի լծակներ ունի։

«Նա պետք է Ադրբեջանի նախագահ Իլհամ Ալիևին համոզի ազատ արձակել 19 հայ գերիներին՝ որպես Ադրբեջանի կողմից մարդասիրական քայլ և հաշտեցմանը ձգտելու դրսևորում»,-նշում է հոդվածի հեղինակը։

Փորձագետը համոզված է, որ TRIPP նախագիծը կարող է առևտրային նոր ուղիներ բացել, իսկ գերիների ազատ արձակումը կապահովի համաձայնագրի մարդասիրական հիմքը։ Եթե Թրամփին հաջողվի հասնել երկուսին էլ, ապա նա կուժեղացնի համաձայնագրի երկարաժամկետ ազդեցությունը։

Հիշեցնենք` պաշտոնական տվյալներով` Ադրբեջանում 19 հայ գերի կա։ Արցախի նախկին ռազմաքաղաքական առաջնորդների գործով «դատավարությունը», որը Բաքվում սկսվել էր 2025 թվականի հունվարին, ավարտվեց այս տարվա փետրվարի 5–ին, և հրապարակվեցին դատավճիռները` ցմահ ազատազրկման դատապարտվեցին Արցախի Հանրապետության նախկին նախագահ Արայիկ Հարությունյանը, ԱԺ նախկին նախագահ Դավիթ Իշխանյանը, ՊԲ նախկին հրամանատար Լևոն Մնացականյանը և ՊԲ հրամանատարի նախկին տեղակալ Դավիթ Մանուկյանը։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվեցին 20 տարվա ազատազրկման։