Աբովյան փողոցում ապաստարանի վրա կառուցված ապօրինի շինություններն են քանդում

Երևանի Աբովյան փողոցում այսօր առավոտից իրականացվում են ապօրինի շինությունների քանդման աշխատանքներ։ Քաղաքապետարանից պարզաբանել են, որ դրանք կառուցվել են նախկին ապաստարանի վրա։

Panorama.am-ի հետ զրույցում Երևանի քաղաքապետարանի հասարակական կարգի պահպանության ծառայության պետի պաշտոնակատար Ավետիք Բաբայանն ասել է, որ աշխատանքներն իրականացվում են Երևանի քաղաքապետի համապատասխան որոշման հիման վրա։

«Տարածքի ստորգետնյա հատվածում նախկինում ապաստարան է եղել, որը հետագայում տնտեսվարողների կողմից զավթվել է, և դրա վրա կառուցվել են ապօրինի շինություններ։ Այս հատվածից մինչև դալանի մոտ գտնվող բոլոր շինությունները անօրինական են»,- նշել է Բաբայանը։

Նրա խոսքով՝ տարածքի վարձակալության իրավունքը դեռևս գործում է, սակայն նախատեսվում է լուծարել նաև համապատասխան պայմանագիրը։ Բաբայանը հավելել է, որ սեփականատերը նախորդ օրը զգուշացվել է քանդման աշխատանքների մասին, իսկ ծանուցումը հրապարակվել է նաև Երևանի քաղաքապետարանի պաշտոնական կայքում։

Նա նշել է, որ տնտեսվարողներին նախապես զգուշացնում են, որպեսզի նրանք հասցնեն իրենց գույքը տեղափոխել և վնասներից խուսափեն։

Անդրադառնալով հարցին, թե ինչու նման աշխատանքների մասին ավելի վաղ չեն տեղեկացնում, Բաբայանը պարզաբանել է, որ նախնական տեղեկացումը կարող է խոչընդոտել գործընթացին, քանի որ տնտեսվարողները հաճախ դիմում են վարչական դատարան, ինչը կարող է ժամանակավորապես կասեցնել քանդման աշխատանքները։