Բարսելոնայի մետրոյում հրդեհի հետևանքով տուժել է մոտ 140 մարդ

Բարսելոնայի մետրոյի առաջին գծի (L1) կոնտակտային ցանցում բռնկված հրդեհի հետևանքով տուժել է 137 մարդ։ Դեպքի պատճառով տարհանվել են Clot և Glòries կայարանները, դադարեցվել է գծի կենտրոնական հատվածի աշխատանքը, խաթարվել է նաև քաղաքային տրանսպորտի բնականոն երթևեկությունը։

Բժշկական շտապ օգնության ծառայության (SEM) տվյալներով՝ տուժածներից 131-ը ստացել են թեթև վնասվածքներ, իսկ վեցի վիճակը գնահատվում է միջին ծանրության։ Ընդհանուր առմամբ 39 մարդ տեղափոխվել է հիվանդանոցներ և շտապ օգնության կենտրոններ։

Ըստ Ara-ի՝ հրդեհը բռնկվել է մետրոյի թունելում։ Clot կայարանում կանգ առած գնացքի ուղևորները, ուժեղ ծխի պատճառով գրեթե ոչինչ չտեսնելով, ինքնուրույն բացել են վթարային դռները, իջել ռելսերի վրա և շուրջ 200 մետր քայլելով հասել մոտակա հարթակ։

Նախնական վարկածով՝ այն կարող էր առաջանալ թունելի երեսպատման մի հատվածի ընկնելու և հետագա բռնկման հետևանքով։

«Transports Metropolitans de Barcelona» (TMB) ընկերության գլխավոր տնօրեն Խավիեր Ֆլորեսը հայտնել է, որ մետրոյի երթևեկությունը կարող է ամբողջությամբ վերականգնվել արդեն հուլիսի 28-ին։