Ֆրանսիայում անտառային հրդեհները սպառնում են ռազմական գործարաններին

Ֆրանսիայի հարավ-արևմուտքում բռնկված բնական հրդեհը սպառնում է Բորդոյից ոչ հեռու գտնվող ռազմական գործարաններին. հայտնում է AFP գործակալությունը՝ հղում անելով իշխանություններին։

Հրապարակման համաձայն՝ Բորդոյի շրջանի արևմուտքում գտնվող պաշտպանական և գիտական կարևոր օբյեկտները հայտնվել են սպառնալիքի տակ լայնամասշտաբ հրդեհի պատճառով, որն ընդգրկել է Արկաշոնի ծոցի շրջակայքը և մոտենում է ագլոմերացիային։

Մասնավորապես, խոսքը վերաբերում է ArianeGroup ընկերության չորս օբյեկտներին, այդ թվում՝  M51 բալիստիկ հրթիռների վառելիքի արտադրության գործարանին։ Այս շրջանում են գտնվում նաև Dassault, Safran և Thales ընկերությունները։

Գործակալության փոխանցմամբ՝ Ֆրանսիայի զինված ուժերի նախարարությունը հայտարարել է նշված ձեռնարկությունների անվտանգությունն ապահովելու նպատակով ուժեր և միջոցներ հատկացնելու մասին։

Նախօրեին լայնամասշտաբ անտառային հրդեհի պատճառով SNCF դադարեցրել էր գնացքների ամբողջ երթևեկությունը Բորդոյից հարավ։ BFMTV հեռուստաալիքի տվյալներով՝ Ժիրոնդ դեպարտամենտում տարհանվածների թիվը գերազանցել է 220 հազարը, իսկ շրջանի տարածքում այրվում է 42 հազար հեկտար։

Անոմալ շոգի հետևանքով առաջացած կրակը պատել է Ֆրանսիայի անտառները։ Ինչպես հայտարարել է երկրի նախագահ Էմանուել Մակրոնը, այս ամառ Ֆրանսիան բախվել է բնական հրդեհների ռեկորդային քանակի՝ Երկրորդ համաշխարհային պատերազմի ավարտից ի վեր ընկած ողջ ժամանակահատվածում։