Շախմատի միջազգային ֆեդերացիայի ռուս նախագահը հրաժարական է տվել ԵՄ պատժամիջոցների ֆոնին

Ռուսաստանցի Արկադի Դվորկովիչը, որը Եվրամիության 21-րդ պատժամիջոցների փաթեթի շրջանակում ընդգրկվել է պատժամիջոցների ցանկում, հայտարարել է, որ ժամանակավորապես հրաժարվում է ՖԻԴԵ-ի՝ Շախմատի միջազգային ֆեդերացիայի (FIDE) նախագահի լիազորություններից, մինչև դատարանում բողոքարկի և վիճարկի իր նկատմամբ կիրառված սահմանափակումները։

Դվորկովիչի հայտարարությունը հրապարակվել է ՖԻԴԵ-ի պաշտոնական կայքում։ Նա ընդգծել է, որ համաձայն չէ ԵՄ որոշման հետ, սակայն մինչև դատական գործընթացի ավարտը չի կատարի կազմակերպության նախագահի պարտականությունները։

ՖԻԴԵ-ի կանոնադրության համաձայն՝ նախագահի պարտականությունները ժամանակավորապես կստանձնի կազմակերպության փոխնախագահը՝ շախմատի աշխարհի 15-րդ չեմպիոն Վիշվանաթան Անանդը։

ՖԻԴԵ-ի խորհուրդը հաստատել է Դվորկովիչի որոշումը՝ նշելով, որ պատժամիջոցների գործողության ընթացքում նա չի համարվի կազմակերպության կամ դրա ակտիվների ղեկավար, տնօրինող կամ վերահսկող անձ։

Եվրամիության 21-րդ պատժամիջոցների փաթեթն ուժի մեջ է մտել հուլիսի 23-ին։ Այն ներառում է ևս 48 ֆիզիկական և 170 իրավաբանական անձի՝ դառնալով Ռուսաստանի դեմ կիրառված ամենախոշոր ընդլայնումներից մեկը։

ԵՄ-ն Դվորկովիչի նկատմամբ պատժամիջոցները հիմնավորել է այն հանգամանքով, որ նա, ըստ Բրյուսելի, հրապարակայնորեն աջակցել է Ռուսաստանի պատերազմին Ուկրաինայի դեմ, ինչպես նաև կապ ունի Ռուսաստանի շախմատի ֆեդերացիայի հետ, որը, ըստ ԵՄ-ի, անցկացրել է շախմատային մրցաշարեր Ուկրաինայի օկուպացված տարածքներում՝ նպաստելով դրանց անօրինական բռնակցման լեգիտիմացմանը։