Իրանը սպառնացել է հարվածել ԱՄՆ-ին աջակցող երկրներին

Ցանկացած երկիր, որը կմասնակցի Իրանի դեմ ԱՄՆ-ի ագրեսիային կամ կօժանդակի իսլամական հանրապետությանը հարվածներ հասցնելուն, օրինական թիրախ կդառնա իրանական զինված ուժերի համար։ Այս մասին հայտարարել է արտաքին գործերի նախարար Աբբաս Արաղչին Չոլպոն-Աթայում Շանհայի համագործակցության կազմակերպության (ՇՀԿ) ԱԳ նախարարների խորհրդի նիստում:

«Իրանը վերահաստատում է իր հաստատակամ վճռականությունը՝ պաշտպանելու երկրի ինքնիշխանությունը, անկախությունը և տարածքային ամբողջականությունը, և հայտարարում է, որ Իրանի դեմ ագրեսիայի իրականացմանը ցանկացած մասնակցություն, համագործակցություն կամ աջակցություն միջազգային պատասխանատվություն կառաջացնի համապատասխան կողմերի համար», - Արաղչիի խոսքերը մեջբերում է Իրանի ԱԳՆ Տելեգրամ-ալիքը: Նրա խոսքով՝ Թեհրանն իրեն իրավունք է վերապահում ձեռնարկել բոլոր անհրաժեշտ միջոցները ինքնապաշտպանության շրջանակներում և ագրեսիային մասնակցած ցանկացած կողմի կդիտարկի որպես զինված ուժերի օրինական թիրախ:

Իրանի ԱԳ նախարարը ՇՀԿ երկրներին կոչ է արել համախմբվածության, համագործակցության և կոչ է արել թույլ չտալ, որ «ագրեսիան փոխարինի դիվանագիտությանը, ուժը փոխարինի իրավունքին, իսկ երկակի չափանիշները փոխարինեն արդարությանը»: «Անվտանգ, կայուն և արդար ապագայի կարելի է հասնել միայն այն ժամանակ, երբ մենք բոլորս մեկ ձայնով պաշտպանենք օրենքի գերակայությունը, պետությունների հավասարությունը, հարգանքը երկրների ինքնիշխանության և ժողովուրդների արժանապատվության նկատմամբ», - հավելել է նա:

ԱՄՆ-ը և Իսրայելը Իրանի դեմ պատերազմը սկսել են փետրվարի 28-ին: Հունիսին Վաշինգտոնը և Թեհրանը ստորագրել են փոխըմբռնման հուշագիր, որը նախատեսում է բոլոր ճակատներում, այդ թվում՝ Լիբանանում, ռազմական գործողությունների անհապաղ դադարեցում: Սակայն հուլիսի 8-ի գիշերը ԱՄՆ-ը վերսկսել է մասշտաբային հարվածները Իրանին՝ նրան մեղադրելով Հորմուզի նեղուցին վերաբերող մասով ձեռք բերված համաձայնությունների պայմանները խախտելու մեջ: