2288 հանցագործություն կես տարում․ Ո՞ր հանցագործություններն են աճել Հայաստանում

2026 թվականի առաջին կիսամյակում պարեկային ծառայողները բացահայտել են 2288 հանցագործության դեպք։ Այս մասին հայտնում է ՀՀ ՆԳՆ հանրային հաղորդակցության և իրազեկման վարչությունը։

ՆԳՆ-ի տվյալներով՝ նախորդ տարվա նույն ժամանակահատվածի համեմատ աճել են թմրամիջոցների և ապօրինի պահվող զենք-զինամթերքի հայտնաբերման դեպքերը։

Թմրամիջոցների հայտնաբերման դեպքերի թիվը կազմել է 1300՝ նախորդ տարվա համեմատ աճելով 80-ով։ Ապօրինի պահվող զենք-զինամթերքի հայտնաբերման դեպքերը հասել են 132-ի՝ աճելով 35 դեպքով։

Աճ է գրանցվել նաև սառը զենքի հայտնաբերման դեպքերում՝ 19,9 տոկոսով։

Պարեկային ծառայողների աշխատանքի արդյունքում բացահայտվել են նաև ֆիզիկական ներգործության, խուլիգանության, գողության, մարմնական վնասվածք պատճառելու, տրանսպորտային միջոցների առևանգման և ապօրինի ծառահատման դեպքեր։

Ուշագրավ է նաև կեղծ փաստաթղթերի հայտնաբերման աճը։ Եթե 2025 թվականի առաջին կիսամյակում արձանագրվել էր նման 60 դեպք, ապա 2026-ին՝ 301։ Դրանցից 300-ը վերաբերում են վարորդական իրավունքի կեղծ վկայականներին։

Բացի այդ, պարեկների կողմից իրականացված միջոցառումների արդյունքում հայտնաբերվել է 90 հետախուզվող անձ՝ նախորդ տարվա նույն ժամանակահատվածի 51-ի դիմաց։