«Ձայն եք տվել, որ ձեզ սոված-ծարավ դուրս շպրտեն»․ Արման Աբովյանը՝ իշխանության ընտրողների մասին

ԲՀԿ պատգամավորի թեկնածու Արման Աբովյանը հայտարարել է, որ Գագիկ Ծառուկյանի ձերբակալությունը համարում է իշխանական համակարգի ինքնաոչնչացման օրինակ։

«Հայաստանն ավտորիտարիզմի ճանապարհին» թեմայով պանելային քննարկման ընթացքում Աբովյանն ասել է, որ ավտորիտարիզմի հիմնական գործիքը վախն է։

«Ավտորիտարիզմի հիմնական ուժը վախն է, այն սկսվում է վախից ու ավարտվում է այնտեղ, որտեղ վերանում է վախը։ Մի վախեցեք»,- ասել է նա։

Անդրադառնալով Գագիկ Ծառուկյանի շուրջ ստեղծված իրավիճակին՝ Աբովյանը նշել է, որ այն վերաբերում է ոչ միայն մեկ անձի, այլ ամբողջ երկրի հասարակական ու տնտեսական իրավիճակին։

«Այն, ինչ կատարվում է Գագիկ Ծառուկյանի հետ՝ կատարվում է երկրի հետ, բոլորիս հետ, սա պետք է շատ հստակ ֆիքսենք»,- ասել է նա։

Նրա խոսքով՝ բազմաթիվ մարդիկ, այդ թվում՝ իշխանությանը նախկինում աջակցած քաղաքացիներ, այսօր բախվում են սոցիալական խնդիրների։

«Ձայն եք տվել, որ ձեզ սոված-ծարավ դուրս շպրտեն»,-հավելել է նա:

Աբովյանը նաև քննադատել է իշխանության տնտեսական ու սոցիալական քաղաքականությունը՝ նշելով, որ որոշումներ են ընդունվել ակցիզային հարկերի բարձրացման, ապահովագրության շահառուների և սոցիալական նպաստ ստացողների թվի կրճատման վերաբերյալ։
Նա այդ քաղաքականությունը որակել է որպես «նեո-ֆաշիզմ»։