ՏԵՍԱՆՅՈՒԹ. Ընդդիմության հիմնական պայքարը պետք է տեղափոխվի փողոց. Սուրենյանց

Քաղաքագետ Սուրեն Սուրենյանցը հայտարարել է, որ ընդդիմության համար անհրաժեշտ է համատեղել խորհրդարանական մանդատներն ու փողոցային պայքարը, սակայն հիմնական հարթակը պետք է լինի փողոցը։

Նրա խոսքով՝ առանց փողոցային ակտիվ պայքարի Ազգային ժողովում ընդդիմությանը սպասվում են լուրջ ճնշումներ։

«Եթե նախորդ խորհրդարանում տեսնում էինք ծեծկռտուքներ և միջադեպեր, ապա այս անգամ կարող է լինել բացահայտ անօրինականություն։ Երևանի ավագանու վերջին նիստը պատահականություն չէր, այլ այն բանի նախադեպը, թե ինչ կարող է սպասվել ընդդիմությանը խորհրդարանում»,- ասել է Սուրենյանցը։

Քաղաքագետի գնահատմամբ՝ ընդդիմությունը պետք է հնարավորինս արագ ձևավորի ոչ թե պարզապես քաղաքական կոնսոլիդացիա, այլ «քաղաքական դիմադրության համակարգ»։

«Իշխանությունը պետք է հասկանա, որ ռեպրեսիաների ճանապարհով գնալը ծանր գին է ունենալու»,- նշել է նա։

Սուրենյանցի խոսքով՝ այս փուլում երկրորդական է՝ ընդդիմությունը կվերցնի՞ պատգամավորական մանդատները, թե՞ ոչ, քանի որ վճռորոշը փողոցային պայքարի կազմակերպումն է։