Ղրիմում զանգվածային հոսանքազրկում է տեղի ունեցել

Ղրիմի ամբողջ տարածքում գրանցվել է էլեկտրամատակարարման զանգվածային անջատում։ Այս մասին «Ինտերֆաքս»-ին հայտնել են «Ղրիմէներգո»-ի թեժ գծից։

«Բարձրավոլտ ցանցերում արտաքին ազդեցություններով պայմանավորված տեխնոլոգիական խափանումների հետևանքով էլեկտրամատակարարումը դադարել է Ղրիմի Հանրապետության բոլոր քաղաքներում և շրջաններում»,– նշել են «Ղրիմէներգո»-ում։

Ներկայում իրականացվում են վթարավերականգնողական աշխատանքներ։

Ավելի վաղ՝ գիշերը, էլեկտրամատակարարումը դադարել էր նաև Սևաստոպոլում։ Քաղաքի իշխանությունների տվյալներով՝ պատճառը Ուկրաինայի զինված ուժերի հարձակումն էր քաղաքի էներգետիկ ենթակառուցվածքների վրա։ Սոցիալական նշանակության օբյեկտները միացվել էին պահուստային սնուցման սխեմաներին։

Սևաստոպոլի նահանգապետ Միխայիլ Ռազվոժաևը հայտնել է, որ առավոտյան դրությամբ էլեկտրամատակարարումը վերականգնվել է բնակելի տների մեծ մասում։