10:00 Լուրերը մեկ տողով. Ուկրաինան հարվածել է «ԼՈՒԿՕՅԼ»-ի հսկա գործարանին, Իսրայելը հրաժարվում ԱՄՆ-ի փողերից

Անցած ժամվա լուրերը՝ հակիրճ և բովանդակային.

·  ԱԺ նախագահի փոփոխության հարցը. Իշխող «Քաղաքացիական պայմանագիր» կուսակցության վարչությունում քննարկվում է Ազգային ժողովի նախագահի պաշտոնում Ալեն Սիմոնյանին Ռուբեն Ռուբինյանով փոխարինելու հարցը: Մամուլում շրջանառվող տարբեր վարկածների ֆոնին Նիկոլ Փաշինյանը հասկացրել է, որ Սիմոնյանը կարող է շարունակել գործունեությունը որպես շարքային պատգամավոր, իսկ Բունդեսթագի պատվիրակությանը երեկ արդեն ընդունել է Ռուբինյանը:

·  Խորհրդարանի անդրանիկ նիստը. Նորընտիր Ազգային ժողովի անդրանիկ նիստը նախատեսված է օգոստոսի 3-ին, որը, ձևավորված ավանդույթի համաձայն, կվարի ամենատարեց պատգամավորը՝ 81-ամյա Կնյազ Հասանովը: Չնայած նիստին ըստ կարգի պետք է ներկա լինեն նաև ՀՀ նախագահն ու Ամենայն Հայոց Կաթողիկոսը, իշխանական թիմում վստահ են, որ Վեհափառ հայրապետին այս անգամ չեն հրավիրի:

·  Կադրային փոփոխություններ ՊՆ-ում. ՀՀ պաշտպանության նախարար Սուրեն Պապիկյանի հրամանով նախօրեին պաշտոններից ազատված գեներալները նոր նշանակումներ են ստացել: Գեներալ-մայոր Ալբերտ Բաղդադյանը նշանակվել է նախարարի խորհրդական, իսկ 2-րդ կորպուսի նախկին հրամանատար, գեներալ-մայոր Արմեն Գյոզալյանը ստանձնել է ՊՆ ռազմական վերահսկողական ծառայության պետի տեղակալի պաշտոնը:

·  ԱԹՍ-ների զանգվածային հարձակում ՌԴ-ում. Ռուսաստանի հակաօդային պաշտպանության միջոցները մեկ գիշերվա ընթացքում ոչնչացրել են ուկրաինական 327 անօդաչու թռչող սարք, որոնցից ավելի քան 25-ը խոցվել է Ռոստովի մարզի վեց շրջաններում:

·  Հրդեհ նավթավերամշակման գործարանում. Ուկրաինական անօդաչուների հարվածների հետևանքով հզոր հրդեհ է բռնկվել Ռուսաստանի խոշորագույն նավթավերամշակման օբյեկտներից մեկում՝ Կստովոյում գտնվող «ԼՈՒԿՕՅԼ» ընկերության գործարանում:

·  ԱՄՆ ռմբակոծիչների դուրսբերումը. Միացյալ Նահանգների ռազմաօդային ուժերը Մեծ Բրիտանիայի «Ֆեյրֆորդ» ավիաբազայից ամբողջությամբ դուրս են բերել իրենց ռազմավարական ռմբակոծիչները, որոնք կիրառվում էին Իրանի դեմ գործողություններում: Այս քայլը հաջորդել է Վաշինգտոնի և Թեհրանի միջև փոխըմբռնման հուշագրի ստորագրմանը:

·  Օդային տարածքի սահմանափակում Ֆինլանդիայում. Ֆինլանդիայի ռազմաօդային ուժերը ժամանակավոր սահմանափակումներ են մտցրել Ֆիննական ծոցի արևելյան հատվածի օդային տարածքում: Սահմանափակումների հստակ պատճառների կամ այլ մանրամասների մասին պաշտոնական հայտարարության մեջ չի հաղորդվում:

·  Թաքեր Կարլսոնի քաղաքական նախագիծը. Ամերիկացի հայտնի լրագրող Թաքեր Կարլսոնը հայտարարել է ԱՄՆ-ում նոր քաղաքական կուսակցություն ստեղծելու մտադրության մասին, որը պետք է այլընտրանք դառնա գործող դեմոկրատներին ու հանրապետականներին: Լրագրողը ներկայիս համակարգն անվանել է «միակուսակցական պետություն» և խոստացել է անել ամեն ինչ այն կործանելու համար, թեև բացառել է սեփական թեկնածության առաջադրումը:

·  Իսրայելը հրաժարվում է ամերիկյան օգնությունից. Իսրայելի վարչապետ Բենիամին Նեթանյահուն հայտարարել է, որ երկրի տնտեսությունը բավականաչափ ուժեղ է ինքնուրույն գոյատևելու համար, և ինքը ցանկանում է արդեն այս տարվանից սկսել Վաշինգտոնի ֆինանսական օգնությունից հրաժարվելու գործընթացը: Սա տեղի է ունենում այնպիսի պայմաններում, երբ միջազգային մամուլը բարձրաձայնում է Իսրայելի աճող միջազգային մեկուսացման մասին: