Բենզինի մատակարարումներն ու գները Ռուսաստանում. Նովակը ներկայացրել է իրավիճակը

Ռուսաստանի փոխվարչապետ Ալեքսանդր Նովակը հայտարարել է, որ երկրի ներքին շուկան ամբողջությամբ ապահովված է բենզինով և դիզելային վառելիքով՝ չնայած այն հանգամանքին, որ մի շարք նավթավերամշակման գործարաններ վերանորոգման փուլում են։

Նրա խոսքով՝ առանձին բենզալցակայաններում երբեմն գրանցվող վառելիքի պակասը պայմանավորված է միայն լոգիստիկ խնդիրներով և արագ վերացվում է։ Կառավարությունն ու նավթային ընկերությունները, ըստ Նովակի, ամենօրյա ռեժիմով վերահսկում են իրավիճակը, իսկ նման դեպքերի համար նախապես ձևավորվել են վառելիքի պաշարներ։

Փոխվարչապետը նաև նշել է, որ խոշոր նավթային ընկերությունները բենզալցակայաններում վառելիքի գները պահպանում են գնաճի սահմաններում։ Անկախ բենզալցակայաններում գների որոշակի տարբերություն կա, սակայն այն, ըստ Նովակի, շուտով կհարթվի՝ շուկայի լիարժեք հավասարակշռվելուց հետո։

Նովակը վստահեցրել է, որ վառելիքի շուկայում ստեղծված իրավիճակի ազդեցությունը գնաճի վրա կլինի նվազագույն։

Նա նաև հայտարարել է, որ Ռուսաստանի տնտեսությունը շուրջ 80%-ով հարմարվել է արտաքին մարտահրավերներին։ Նրա խոսքով՝ երկրի ՀՆԱ-ում վառելիքաէներգետիկ համալիրի մասնաբաժինը նվազել է՝ նախկին 18-20%-ից հասնելով 13%-ի, իսկ պետական եկամուտներում դրա բաժինը 42%-ից կրճատվել է մինչև 22%։