Իրանը վերադարձնում է միլիարդները․ Կատարը համաձայնել է ապասառեցնել 6 միլիարդ դոլար

Իրանը և Կատարը համաձայնության են եկել էմիրությունում գտնվող իրանական 12 միլիարդ դոլար ընդհանուր ծավալով ակտիվներից 6 միլիարդ դոլարի ապասառեցման վերաբերյալ, ինչի մասին հայտնել է Փեզեշքիանը։

Իրանի Կենտրոնական բանկի ղեկավար Աբդոլնասեր Հեմմատին հունիսի 23-ին հայտարարել էր, որ Միացյալ Նահանգներն առաջին փուլի շրջանակներում կապասառեցնի Իրանի սառեցված 12 միլիարդ դոլարի միջոցները։

«Իրականացված ծրագրի համաձայն՝ Կատարում գտնվող իրանական 12 միլիարդ դոլարից 6-ը կապասառեցվի և կհասնի Իրան։ Ինչ վերաբերում է մնացած միջոցների վերադարձին, ապա այս պահին դրա ուղղությամբ աշխատանքներ են տարվում», - ասել է Փեզեշքիանը։

Հիշեցնենք, որ հունիսի 18-ի լույս գիշերը Իրանն ու ԱՄՆ-ը հեռավար ձևաչափով հուշագիր են ստորագրել, որով նախատեսվում է փետրվարի 28-ին սկսված ռազմական հակամարտության դադարեցումը։ Փաստաթղթով սահմանվում են նաև այն ժամկետները, թե երբ է ԱՄՆ-ը վերացնելու ծովային շրջափակումը, և երբ է Իրանը վերականգնելու նավագնացությունը Հորմուզի նեղուցում։

Բացի այդ, Իրանը հանձն է առնում միջուկային զենք չստանալ, իսկ Իրանի միջուկային ծրագրի խնդիրը ենթակա է կարգավորման առանձին համաձայնագրով։ Այս կապակցությամբ կողմերը 60 օրվա ընթացքում բանակցություններ կվարեն։ Թեհրանի համար վերջնական նպատակը հակաիրանական պատժամիջոցների չեղարկումն է։