Աբովյան քաղաքում զինված հարձակում է տեղի ունեցել. քաղաքացին ահազանգում է

Աբովյան քաղաքում զինված հարձակում է տեղի ունեցել, այս մասին ահազանգել է ֆեյսբուքյան օգտատեր Վահե Աղաջանյանը։

«Այսօր սարսափելի տեսարանի ականատես եղա իմ հարազատ Աբովյան քաղաքում ու սա արդեն կդժվարանամ հիշել, թե այս տարի որերորդ նման դեպքն է: Ուսումնական մեքենա էինք վարում ու մեր առաջ, քաղաքի գլխավոր խաչմերուկներից մեկում, մոտ 15 հոգի մահակներով ու այլ սառը զենքերով հարձակվեցին 2-3 հոգու վրա` դաժան ծեծի ենթարկելով նրանց ու հետո անմիջապես վազելով դիմեցին փախուստի` տարբեր խմբերի բաժանված: Տարածքում նաև կային բազմաթիվ կանայք, երեխաներ, ծերեր, մարդիկ դուրս էին եկել զբոսնելու:

Առաջ նման հարցերին այլ կերպ էի վերաբերվում, բայց հիմա սրա դեմ պայքարի մեկ տարբերակ կա` օրենք: Նկատեցի, որ ոստիկանները մի խմբի հասցրեցին գտնել ու այս գրառումը ևս փաստացի հաղորդում է հանցագործության մասին:

Փողոցի խուժանը մեր երկրում չի կարող տեղ ունենալ ու, չնայած ես շատ դժգոհ եմ ոստիկանության աշխատանքից, բայց նման իրավիճակներում առնվազն ահազանգելը համարում եմ քաղաքացու պարտականությունը: Էս բառդակի վերջը պետք է տալ»,֊ իր դժգոհությունն է հայտնել ֆեյսբուքյան օգտատեր Վահե Աղաջանյանը։