Կառավարությունում քննարկվել է Երևանի «Կոնդ» թաղամասի վերակառուցման հայեցակարգը

Վարչապետ Նիկոլ Փաշինյանի գլխավորությամբ տեղի ունեցած խորհրդակցության ընթացքում քննարկվել է Երևանի «Կոնդ» թաղամասի քաղաքաշինական հայեցակարգը։

Քաղաքաշինության կոմիտեի նախագահ Եղիազար Վարդանյանը ներկայացրել է նախագծի հիմնական ուղղությունները՝ նշելով, որ այն հիմնված է Կոնդի պատմական միջավայրի պահպանման, տնտեսական զարգացման և մշակութային ակտիվացման համադրման վրա։

Նախատեսվում է պահպանել և վերականգնել պատմամշակութային ժառանգությունը, բարելավել ինժեներական և տրանսպորտային ենթակառուցվածքները, բարձրացնել ներդրումային գրավչությունն ու խթանել զբոսաշրջությունը։

Քննարկման ընթացքում անդրադարձ է կատարվել նաև վերակառուցման համար անհրաժեշտ քաղաքաշինական կարգավորումներին, այդ թվում՝ կառուցապատման չափորոշիչներին, փողոցային ցանցի արդիականացմանը, լուսավորության և թաղամասի մուտքերի բարեկարգմանը։

Վարչապետ Փաշինյանը նշել է, որ ծրագրի հաջող իրականացման համար անհրաժեշտ է մշակել հստակ գործողությունների ծրագիր՝ համադրելով քաղաքաշինական, սոցիալական և տնտեսական գործոնները։