Երևանում Արցախի դրոշի տեղադրման փորձի ժամանակ ՀՅԴ ՀԵՄ երկու անդամ է բերման ենթարկվել

Երևանում բերման են ենթարկվել ՀՅԴ Հայաստանի երիտասարդական միության երկու անդամներ՝ Արցախի դրոշը վերականգնելու փորձի ժամանակ։

ՀՅԴ Հայաստանի երիտասարդական միությունը հայտնում է, որ վերջին օրերին Երևանի քաղաքապետարանի հրահանգով Ֆրանսիայի հրապարակից հեռացվում է 2022 թվականին քաղաքացիների կողմից տեղադրված Արցախի դրոշը։

Ըստ հայտարարության՝ ՀՅԴ ՀԵՄ անդամները մի քանի անգամ վերականգնել են դրոշը, սակայն այն կրկին հեռացվել է։

«Երեկ երեկոյան երրորդ անգամ դրոշը հեռացնելուց հետո այն վերականգնելու փորձի ժամանակ ապօրինի բերման են ենթարկվել ՀՅԴ ՀԵՄ երկու անդամներ», - նշվում է հայտարարությունում։

Հիշեցվում է, որ վերջին օրերին շարունակվում են Արցախի դրոշի հեռացման գործողությունները Ֆրանսիայի հրապարակից, ինչը կազմակերպիչների գնահատմամբ առաջացրել է երիտասարդների բողոքը և միջամտությունը։