IMEI նոր համակարգը կարող է հանգեցնել հեռախոսների վերահսկման՝ փորձագետ

Տեղեկատվական անվտանգության հարցերով փորձագետ Արթուր Պապյանը ֆեյսբուքյան գրառմամբ անդրադարձել է կառավարության կողմից հավանության արժանացած նախագծին, որով նախատեսվում է ներդնել IMEI կոդերի միասնական շտեմարան։

Նրա խոսքով՝ նախագիծը ներկայացվում է որպես տեխնիկական լուծում՝ «ստվերի դեմ պայքար» և «հեռախոսների գողության կանխում», սակայն իրականում այն կարող է ենթադրել ավելի լայն վերահսկողական մեխանիզմներ։

Պապյանը նշել է, որ առաջարկվող համակարգում նախատեսվում է կապել քաղաքացիների անձնագրային տվյալները, հեռախոսի IMEI կոդերը և SIM/eSIM քարտերի տվյալները, ինչը, ըստ նրա, կարող է հնարավորություն տալ տեսնել՝ ով, երբ և ինչ սարքով է միացել ցանցին։

Նա նաև մտահոգություն է հայտնել տվյալների կենտրոնացված շտեմարանի հնարավոր խափանումների, ինչպես նաև դրա անվտանգության ռիսկերի վերաբերյալ՝ նշելով, որ նման բազան կարող է դառնալ կիբեռհարձակումների թիրախ։

Փորձագետը ուշադրություն է հրավիրել նաև նախագծի այն դրույթի վրա, ըստ որի՝ համակարգի ադմինիստրատորը կարող է տվյալները տրամադրել պետական կամ տեղական մարմիններին, ինչպես նաև հնարավոր է՝ որոշ դեպքերում մասնավոր կազմակերպություններին։

Արթուր Պապյանը իր գրառման մեջ նաև պնդում է, որ նման համակարգը կարող է կիրառվել ոչ միայն հանցագործությունների դեմ պայքարում, այլ նաև այլ նպատակներով, ինչի վերաբերյալ, ըստ նրա, կան մտահոգություններ։