Նիկոլ Փաշինյանը խոսել է ԵԱՏՄ քայքայման անխուսափելիության մասին

Վարչապետ Նիկոլ Փաշինյանը Կառավարության ճեպազրույցի ընթացքում հայտարարել է, որ հարցերի արագ չկարգավորման դեպքում ԵԱՏՄ քայքայումը կդառնա անխուսափելի։

Նա նշեց, որ անհանգստացած է ԵԱՏՄ գործընթացներով, սակայն կարծում է, որ կառույցի մյուս գործընկերները նույնպես պետք է մտահոգված լինեն: Վարչապետի ձևակերպմամբ՝ միության անդամ մյուս պետությունները լիովին համոզված մտահոգվում են Հայաստանի այս փորձով, քանի որ ենթադրում են, որ նույն իրավիճակը կարող է կրկնվել նաև իրենց հետ:

«Եթե մենք հիմա սա արագ չկարգավորենք, սա ԵԱՏՄ քայքայումը դարձնելու է անխուսափելի: Ուղղակի անխուսափելի: Հայաստանի մասին չի խոսքը: Ես ասել եմ՝ մենք ԵԱՏՄ-ից դուրս գալու խնդիր մեր առաջ չենք դրել, պարզապես եթե այս հարցերը չկարգավորվեն, ԵԱՏՄ քայքայումը դառնալու է անխուսափելի»,- ասաց նա:

Հարկ է հիշեցնել, որ այսօր կայացած Կառավարության նիստին Փաշինյանը, անդրադառնալով ԵԱՏՄ-ի հետ կապերին և ռուսական շուկա հայկական արտադրանքի արտահանման խնդիրներին, նշել էր, որ միության ձևաչափում առկա է քննարկելու անհրաժեշտություն, և ինքը մոտ ժամանակներս կօգտագործի այդ հնարավորությունը քննարկում նախաձեռնելու համար: