Պեսկովի աղմկահարույց հայտարարությունը․ համաշխարհային պատերազմի ռիսկն աճում է

Աշխարհում ներկայումս գրեթե չեն մնացել միջազգային անվտանգության ապահովման արդյունավետ մեխանիզմներ, և գլոբալ պատերազմի կանխարգելման միակ գործոնը միջուկային զսպումն է։ Այս մասին  հայտարարել է Ռուսաստանի Դաշնության նախագահի մամուլի քարտուղար Դմիտրի Պեսկովը։

Կրեմլի խոսնակի փոխանցմամբ՝ համաշխարհային անվտանգության ճարտարապետությունը ներկայումս ենթարկվել է լուրջ էրոզիայի։ 

«Այսօր այն լրջորեն քայքայված է։ Շատ առումներով, բացի միջուկային զսպումից, մենք աշխարհում ոչինչ չունենք։ Դա միակ բանն է, որը պաշտպանում է աշխարհը համաշխարհային պատերազմից», - ասել է Պեսկովը։

Դմիտրի Պեսկովն ընդգծել է, որ միջուկային զսպման գործոնը չի կարող ապահովագրել աշխարհը տարածաշրջանային հակամարտություններից, որոնց ընդհանուր ներուժն ու հավանականությունը ներկայումս աճման միտում ունեն։

Բացի այդ, ՌԴ նախագահի մամուլի քարտուղարը հավելել է, որ տեխնոլոգիական ակտիվ զարգացման հետևանքով սպասվում է սպառազինության նոր տեսակների ի հայտ գալը։ Դրանք, չլինելով միջուկային, իրենց կործանարար ուժով և հետևանքներով ապագայում կարող են հավասարվել միջուկային զենքի պոտենցիալին։