Ավինյանը բարկացավ․ բախչաների ու քոլիկների տերերը հիշեք՝ ինչ դիմադրություն էին կազմակերպում

Տորք Անգեղի արձանի հարակից տարածքում իրականացվող աշխատանքների երկրորդ փուլն է ընթանում։ Մասնավորապես, ավարտվել են ամֆիթատրոնի և բեմի բետոնապատման, ֆուտբոլային դաշտի կառուցման, ինչպես նաև սանհանգույցների ներքին հարդարման աշխատանքները և այլն։ Այս մասին այսօր Երևանի քաղաքապետարանի գործակարգավարական խորհրդակցության ժամանակ հայտնել է Նոր Նորք վարչական շրջանի ղեկավար Մարատ Սևոյանը։ 

Արձագանքելով՝ Ավինյանն ասել է, որ Տորք Անգեղի արձանի շուրջ ձևավորվող նոր այգին վարչական շրջանի համար դառնալու է նոր ձգողության կենտրոն։

«Ընդհանրապես, այն նոր ձգողության կենտրոն է դառնալու բոլոր երևանցիների համար։ Ուզում եմ, որ բոլորս վերհիշենք, թե ինչ վիճակում էր այս այգին մոտ երեք տարի առաջ, և թե ինչ մեծ դիմադրություն էր կազմակերպվում այնտեղի բախչաների տերերի ու քոլիկներ խփած մարդկանց կողմից։ Հանրային տարածքները պետք է վերադարձվեն հանրությանը։ Հանրային տարածքները պատկանում են բոլորին, և սա շատ լավ օրինակ է, թե ինչպես է հանրային տարածքը վերադարձվում քաղաքին ու երևանցիներին»,- ասել է նա։