Հակակոռուպցիոն կոմիտեն առաջարկում է սահմանափակել որոշ կուսակցությունների ընտրություններին մասնակցելը

Հակակոռուպցիոն կոմիտեն առաջարկում է արգելել ընտրական հանցագործությունների մասնակից  քաղաքական ուժերի մասնակցությունն ընտրություններին:

ՀՀ հակակոռուպցիոն կոմիտեն ամփոփել է 2026 թվականի ԱԺ ընտրություններին նախորդող ժամանակահատվածում բացահայտված կոռուպցիոն բնույթի ընտրական հանցագործությունների դեպքերի առթիվ իրականացվող վարույթների տվյալները, հայտնել են կոմիտեից ու կից տվյալներ ներկայացրել, որոնք վերաբերվում են միայն ընդդիմադիր երեք ուժերին՝ «Ուժեղ Հայաստան», «Հայաստան» դաշինք, «Բարգավաճ Հայաստան»։

Դրանց հիման վրա ՀՀ հակակոռուպցիոն կոմիտեի նախագահը դիմել է ՀՀ արդարադատության նախարարին՝ միջնորդելով նախաձեռնել այնպիսի օրենսդրական փոփոխություններ, որոնք հետայսու նվազագույնի կհասցնեն բացահայտված հանցավոր սխեմաների կիրառման հնարավորությունը, այդ թվում՝ այդպիսի սխեմաներում ներգրավված քաղաքական ուժերի մասնակցությունն ընտրական գործընթացներին արգելելու եղանակով: