Լավրովի աղմկահարույց հայտարարությունը Եվրոպայի և Ուկրաինայի մասին

Եվրոպան ցանկանում է պահպանել Կիևում գործող նացիստական ռեժիմը, որպեսզի Ռուսաստանի դեմ մշտական հենակետ ունենա։ Այս մասին, ՏԱՍՍ-ի փոխանցմամբ, հայտարարել է Ռուսաստանի արտաքին գործերի նախարար Սերգեյ Լավրովը։

«Նրանք ցանկանում են հավերժացնել նացիստական ռեժիմը՝ նրանից չպահանջելով կատարել ո՛չ ՄԱԿ-ի կանոնադրությունը, ո՛չ բազմաթիվ կոնվենցիաները, ո՛չ էլ սեփական Սահմանադրությունը։ (...) Եվրոպան ցանկանում է դա պահպանել՝ ունենալով մշտական հենակետ Ռուսաստանի դեմ սպառնալիքներ ստեղծելու համար։ Եվ պատերազմել, ինչպես սկզբից էին ասում, մինչև վերջին ուկրաինացին», — ասել է ՌԴ ԱԳ նախարարը։

Լավրովի խոսքով՝ եվրոպացիները մտադիր են Ուկրաինային տրամադրել անվտանգության երաշխիքներ և Ռուսաստանին ներկայացնել հակամարտության կարգավորման իրենց պայմանները։

Ավելի վաղ Լավրովը հայտարարել էր, որ Եվրամիությունն արդեն բաց է թողել Ռուսաստանի հետ երկխոսության բազմաթիվ հնարավորություններ։ Նա նշել էր, որ ԵՄ-ում Մոսկվայի հետ ապագա շփումների վերաբերյալ քննարկումները լուրջ բնույթ չեն կրում։