Կրեմլի բոտերի ցանցը նոր կեղծ տեսանյութ է տարածում․ Փաշինյանը երեխայի չի հարվածել. FIP

Փաստերի ստուգման հարթակը հայտնում է. «Կրեմլի «Storm 1516» ցանցը X-ում արհեստական բանականությամբ գեներացված նոր կեղծ տեսանյութ է տարածել ՀՀ վարչապետ Նիկոլ Փաշինյանի մասին, որում նա իբրև թե հարվածում է մանկահասակ երեխային։ 

Տեսանյութի բնօրինակը նկարահանվել է 2025 թվականի մայիսի 30-ին, երբ Նիկոլ Փաշինյանն այցելել էր Գյումրու «Զանգակ» մանկապարտեզ․ այնտեղ երեխաների հետ շփման ընթացքում Փաշինյանը ողջագուրվում է լացող երեխայի հետ, և չի հարվածում նրան, ինչպես պատկերված է ԱԲ-ով խմբագրված տեսանյութում։ 

Փաստացի, Կրեմլի բոտերի ցանցը հերթական կեղծ արշավն է իրականացրել Փաշինյանի դեմ։ 

Հատկանշական է, որ X-ի հաշիվների համապատասխան հրապարակումների մեկնաբանությունների տիրույթում առաջին անգամ հայտնվել են հայալեզու մեկնաբանություններ, որոնք նույնպես արվել են բոտերի կողմից, համակարգված ու նույն ժամանակի մեջ։  Փաշինյանին քննադատող մեկնաբանությունները նույնաբովանդակ են, և միևնույն  նախադասությունը տեղադրվել է բոտային տարբեր հաշիվների կողմից։ 

Այսպիսով, Կրեմլի կողմից իրականացվող ապատեղեկատվական արշավի շրջանակում բոտային հաշիվները տարածել են հերթական կեղծիքը Փաշինյանի մասին, ինչպես նաև համաժամանակյա տեղադրել հայալեզու մեկնաբանություններ»։