ԵՄ-ն չի կարող փոխհատուցել Հայաստանի կորուստները. Շոյգու

Ռուսաստանից զբոսաշրջության հոսքի կրճատման հետևանքով Հայաստանի կորուստները կարող են հասնել մինչև 1,5 մլրդ դոլարի, և ԵՄ-ն չի կարող փոխհատուցել այդ գումարները։ Այս մասին հայտարարել է ՌԴ Անվտանգության խորհրդի քարտուղար Սերգեյ Շոյգուն, գրում է ՏԱՍՍ-ը:

Նրա խոսքով՝ Եվրամիությունը կարող է Հայաստանին տրամադրել միայն համեմատաբար փոքր ֆինանսական աջակցություն, որը չի կարող ծածկել ռուս զբոսաշրջիկներից հրաժարվելու արդյունքում առաջացած վնասները։

«Եվրամիությունը կարող է հատկացնել փոքր գումարներ, օրինակ՝ 1,5 մլն եվրո այսպես կոչված «անկախ մեդիայի» զարգացման համար։ Կամ, օրինակ, 2,2 մլն եվրո՝ վիզային ռեժիմի ազատականացմանն աջակցելու նպատակով», — ասել է Շոյգուն։

Ավելի վաղ ՌԴ Պետդումայի նախագահ Վյաչեսլավ Վոլոդինը հայտարարել էր, որ Հայաստանը, ԵՄ-ին անդամակցելու դեպքում, ակնհայտորեն կորուստներ կունենա։ Նրա խոսքով՝ Երևանը տարածաշրջանային այդ միությանը միանալու պարագայում կկորցնի իր ինքնությունը։