12:00 Լուրերը մեկ տողով. Զինվորի մահվան դեպք ՊՆ զորամասում, «Արարատցեմենտի» ձևական աճուրդները

Անցած ժամվա լուրերը՝ հակիրճ և բովանդակային.

·  ՊՆ N զորամասի տարածքում հայտնաբերվել է զինծառայող Արամայիս Գևորգյանի դին, և գերատեսչությունը վշտակցություն է հայտնել ընտանիքին, իսկ դեպքի բոլոր հանգամանքները լիարժեք պարզելու նպատակով այժմ ընթանում է նախաքննություն:

·  Ռուսաստանի կողմից հայկական մրգերի ներմուծման ժամանակավոր արգելքի ֆոնին, վարչապետ Նիկոլ Փաշինյանը հայտարարել է, որ անորակ ապրանքների արտահանումն անթույլատրելի է, սակայն պետությունը սուբսիդավորման ծրագրերով կաջակցի բոլոր այն տնտեսվարողներին, որոնք բախվել են արտահանման անարդար խոչընդոտների:

·  «Ռուսաստանի սննդամթերքի վարչության» ներկայացուցիչը հայտնել է, որ հայկական ծիրանի, կեռասի, խաղողի և դեղձի ներմուծման սահմանափակումները էական ազդեցություն չեն ունենա շուկայի վրա, քանի որ դրանք հեշտությամբ կփոխարինվեն Թուրքիայից, Ուզբեկստանից, Մոլդովայից և այլ երկրներից իրականացվող մատակարարումներով:

·  Երևանի քաղաքապետ Տիգրան Ավինյանը հայտարարել է, որ քաղաքում այլևս հին տրոլեյբուսներ չեն շահագործվելու, և գիծ դուրս բերված բոլոր 45 նոր տրոլեյբուսներն ամբողջությամբ փոխարինել են հնամաշ շարժակազմը:

·  «Միասնության թևեր» կուսակցության վարչապետի թեկնածու Արման Թաթոյանը քննադատել է Սփյուռքի հանդեպ ձևավորված ավանդական մոտեցումը՝ ընդգծելով, որ այն պետք է դիտարկել ոչ թե պարզապես ֆինանսական միջոցների աղբյուր, այլ երկրի զարգացման համար անհրաժեշտ գիտելիքի ու միջազգային կապերի հզոր ներուժ:

·  «Ուժեղ Հայաստան»-ի առաջնորդ Սամվել Կարապետյանը Տավուշի մարզի բնակիչների հետ հանդիպման ժամանակ քննադատել է գործող իշխանություններին և հայտարարել, որ իր համար պատվի հարց է լինելու երկրում ծայրահեղ աղքատության և սովի ամբողջական վերացումը:

·   Դատախազությունը դիմել է Հակակոռուպցիոն դատարան՝ պահանջելով անվավեր ճանաչել 2009 թվականին Արարատի նախկին համայնքապետի կողմից ձևական աճուրդներով «Արարատցեմենտ» ընկերությանը համայնքային նշանակության 74.1 հեկտար արոտավայրերի օտարման գործարքները:

·  Իսլամական հեղափոխության պահապանների կորպուսի ռազմածովային ուժերը թևավոր հրթիռներով հարվածել են ԱՄՆ-ի և Իսրայելի հետ կապվող մի նավի՝ հայտարարելով, որ սա պատասխան էր Օմանի ծոցում իրանական նավի դեմ ամերիկյան զինուժի գործողություններին: