18:00 Լուրերը մեկ տողով. ԵԱՏՄ-ն Հայաստանից հանրաքվե է պահանջում, խուզարկություններ ԲՀԿ-ի գրասենյակներում

Անցած ժամվա լուրերը՝ հակիրճ և բովանդակային.

·  ԵԱՏՄ-ն Հայաստանից հանրաքվե է պահանջում: Ռուսաստանի, Ղազախստանի, Ղրղզստանի և Բելառուսի ղեկավարները համատեղ հայտարարությամբ կոչ են արել Երևանին հնարավորինս շուտ անցկացնել հանրաքվե՝ ԵՄ-ին անդամակցելու կամ ԵԱՏՄ-ում մնալու վերաբերյալ։ Միության անդամ երկրները նախազգուշացրել են, որ Հայաստանի եվրոպական ինտեգրումը լուրջ ռիսկեր է պարունակում։

·  ՀՀ էկոնոմիկայի նախարարությունը հանդիպում է կազմակերպել խոշոր ջերմոցային տնտեսությունների ներկայացուցիչների հետ՝ քննարկելու ոլորտի մարտահրավերներն ու արտահանման դիվերսիֆիկացման հեռանկարները։ Այս քայլն արվում է այն բանից հետո, երբ «Ռոսսելխոզնադզորը» նախ արգելեց հայկական ծաղիկների, իսկ այնուհետև՝ պտուղ-բանջարեղենի ներկրումը Ռուսաստան։

·  Հակակոռուպցիոն կոմիտեն ընտրակաշառք տալու և ստանալու դեպքերի առթիվ նախաձեռնված երկու քրեական վարույթների շրջանակներում խուզարկություններ է իրականացրել «Բարգավաճ Հայաստան» կուսակցության Աբովյանի և Արթիկի տարածքային գրասենյակներում։ Ձերբակալվել է 7 անձ։

·  Վրաստանի վարչապետ Իրակլի Կոբախիձեն հայտարարել է, որ Միացյալ Նահանգներն Ադրբեջանի և Հայաստանի հետ իր գործընկերությունը բարձրացրել է որակական նոր մակարդակի։ 

·  ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվայի հայելային պատասխան քայլերը երկար սպասեցնել չեն տա Ռումինիայի կողմից Կոնստանցայում Ռուսաստանի գլխավոր հյուպատոսությունը փակելու որոշումից հետո։ 

·  Ուկրաինայի նախագահ Վլադիմիր Զելենսկին Ավստրիայի կանցլերի հետ հեռախոսազրույցում հայտնել է հետախուզական նոր տվյալներ, ըստ որոնց՝ Ռուսաստանը զանգվածային հարձակում է նախապատրաստում ուկրաինական քաղաքների ու համայնքների ուղղությամբ։ 

·  Իրանի խորհրդարանի նախագահ Մոհամադ Բաղեր Ղալիբաֆը հայտարարել է, որ Թեհրանը զիջումների է հասնում ոչ թե երկխոսության, այլ հրթիռների օգնությամբ, որոնք բանակցություններում իրենց խոսքն ավելի հասկանալի են դարձնում։