Ռուսաստանից զանգվածային արտաքսումներ, քաղաքացիությունից զրկում․ Վոլոդինը մանրամասնում է

Ռուսաստանի Դաշնության պետական ​​դուման քայլեր է ձեռնարկում միգրացիոն օրենսդրության խստացման ուղղությամբ։ Խորհրդարանի ստորին պալատն առաջին ընթերցմամբ հավանություն է տվել օրենսդրական այն փոփոխություններին, որոնք հնարավորություն են տալիս երկրից արտաքսել վարչական իրավախախտումներ թույլ տված օտարերկրյա քաղաքացիներին։ Նոր կարգավորումները հիմնականում վերաբերում են հասարակական համակեցության և վարքագծի կանոնների խախտումներին։

ՌԴ Պետդումայի նախագահ Վյաչեսլավ Վոլոդինի փոխանցմամբ՝ օրենսդրական այս նախաձեռնությունը պայմանավորված է հանրային անվտանգության ապահովման անհրաժեշտությամբ և հասարակության շրջանում առկա դժգոհություններով։ Ըստ պաշտոնական հայտարարության՝ աշխատանքային միգրանտները պետք է գիտակցեն, որ ցանկացած իրավախախտում իրենից ենթադրելու է ոչ միայն վարչական պատասխանատվություն, այլև հեռացում երկրի տարածքից։

Բացի այդ, ռուսաստանցի պատգամավորները համաձայնության են եկել ևս մեկ սահմանափակման շուրջ, որը վերաբերում է կացության կարգավիճակի և քաղաքացիության շնորհմանը։ Այսուհետ չմարված կամ չհանված դատվածություն ունեցող օտարերկրացիներին կմերժվի ՌԴ քաղաքացիություն կամ կացության թույլտվություն տրամադրելու գործընթացը։

Նախատեսվող փոփոխությունները նպատակ ունեն ուժեղացնել վերահսկողությունը Ռուսաստանում օտարերկրացիների գտնվելու օրինականության, նրանց զբաղվածության և ստացած եկամուտների նկատմամբ։ Սա թույլ կտա կանխարգելել անօրինական միգրացիայի հետ կապված հնարավոր խնդիրները։