Արտաքին հրահանգ հայ ընտրողին. Ռուսաստանը սպառնում է բաց տեքստով

Մոսկվան հույս ունի, որ հայ հասարակությունը կկանխի, որ որևէ մեկն իր երկիրը Ռուսաստանի հետ բախման մեջ ներքաշի առաջիկա խորհրդարանական ընտրությունների ֆոնին։ Այս մասին հայտարարել է Ռուսաստանի փոխարտգործնախարար Միխայիլ Գալուզինը։ Միջազգային իրավունքի և դիվանագիտական էթիկայի տեսանկյունից՝ այլ երկրի պաշտոնյայի կողմից ինքնիշխան պետության ներքին ընտրական գործընթացների հիշատակումն ու դրանց ելքի վերաբերյալ «հույսեր» հայտնելն արդեն իսկ միջամտություն է։ 

Մոսկվան շրջանցում է Հայաստանի պաշտոնական իշխանություններին և դիմում է անմիջապես հանրությանը: Սա դասական «ժողովրդական դիվանագիտության» կամ ավելի շուտ՝ հանրային ճնշման գործիք է: Ավելին,  «բախում» բառի օգտագործումը պատահական չէ: Դիվանագիտական լեզվում սա բավականին կոշտ և սպառնալից տերմին է:Մոսկվան փորձում է հայ հասարակության մեջ արթնացնել անվտանգային վախեր:

 Ուղերձն այն է, որ Ռուսաստանի հետ հարաբերությունների վատթարացումը կարող է ունենալ ոչ միայն տնտեսական կամ քաղաքական, այլև անվտանգային հետևանքներ: Փաստենք թերևս, Կրեմլը գալիք ընտրությունները Հայաստանի ներքին հարցից փորձում է վերածելու «Ռուսաստանի հետ կամ ընդդեմ Ռուսաստանի» աշխարհաքաղաքական ընտրության: