Բաքվում որոշում է կայացվել ռուս բանտարկյալների վերաբերյալ

Բաքվի ծանր հանցագործությունների դատարանը կայացրել է Ռուսաստանի Դաշնության երկու քաղաքացիների վերաբերյալ դատավճիռը՝ կիբերհանցագործությամբ ստացված միջոցների օրինականացման գործով։

Բաքվի ծանր հանցագործությունների դատարանում ավարտվել է ՌԴ քաղաքացիներ Իգոր Զաբոլոցկիխի և Իլնուր Վալիտովի դեմ հարուցված քրեական գործի քննությունը։ ՏՏ մասնագետները մեղադրվում էին կիբերհանցագործությունների միջոցով ձեռք բերված 98 հազար մանաթի օրինականացման մեջ։ 

Դատավոր Սաբուհի Հուսեյնովի նախագահությամբ ընթացող նիստում հրապարակվել է վճիռը, որի համաձայն՝ Իգոր Զաբոլոցկիխը և Իլնուր Վալիտովը դատապարտվել են 3-ական տարի ժամկետով ազատազրկման։ Երկու ամբաստանյալներն էլ մեղավոր են ճանաչվել Ադրբեջանի Քրեական օրենսգրքի 193-1.3.2 հոդվածով, որը նախատեսում է պատասխանատվություն հանցավոր ճանապարհով ստացված գույքի օրինականացման համար։