ԱՄՆ–ն մշակում է նոր հզոր միջուկային ռումբ

ԱՄՆ Միջուկային անվտանգության ազգային վարչությունը (NNSA) նախաձեռնել է նոր հզոր միջուկային զինամթերքի ստեղծումը, որը թիրախավորելու է խորը տեղակայված ռազմավարական օբյեկտները։

Միացյալ Նահանգների Միջուկային անվտանգության ազգային վարչությունը սկսել է Nuclear Deterrent System-Air-delivered (NDS-A) նախագծի իրականացումը, որի համար արդեն հատկացվել է շուրջ 100 միլիոն դոլար։ Նոր ավիառումբը կունենա մոտ 400 կիլոտոննա հզորություն և կներառի գոյություն ունեցող B61-11, -12 և -13 բետոնահար զինամթերքների տարրեր։ Ըստ The War Zone-ի՝ զենքի կառուցվածքի վերաբերյալ մանրամասները դեռևս գաղտնի են պահվում, սակայն հայտնի է, որ այն մատակարարվելու է օդային ճանապարհով։

Մասնագետները ենթադրում են, որ զինամթերքը կունենա պոչային թևավորում՝ դառնալով կառավարելի և ճշգրիտ։ Սա թույլ կտա ռումբը նետել մեծ բարձրությունից, որից հետո այն ինքնավար կսավառնի դեպի թիրախը բազմաթիվ կիլոմետրեր։ Հնարավոր է նաև հրթիռային արագացուցիչի կիրառում, ինչն ապահովելու է ինքնաթիռների անվտանգ հեռավորությունը թիրախից։

Նոր միջուկային ավիառումբերով զինվելու են B-2 Spirit և մշակման փուլում գտնվող B-21 Raider ռազմավարական ռմբակոծիչները, իսկ զինանոցը տեղակայվելու է ԱՄՆ տարածքում։ NNSA-ի ներկայացուցիչը նշել է, որ NDS-A համակարգը նախագահին կընձեռի լրացուցիչ հնարավորություններ՝ խոցելու պաշտպանված և խորը տեղակայված թիրախները։ Պաշտոնյայի խոսքով՝ ծրագիրն արագ է զարգանում, և հավելյալ տվյալներ կհրապարակվեն ռազմավարական նպատակահարմարությունից ելնելով։

NNSA-ն հանդիսանում է ԱՄՆ էներգետիկայի նախարարության կիսաինքնավար կառույցը, որը համակարգում է միջուկային զենքի մշակման, արդիականացման և պահպանման գործընթացները։