Ադրբեջանում ազատությունից զրկված բոլոր հայերը պետք է անհապաղ ազատ արձակվեն. ՀՀ ՄԻՊ

«Ադրբեջանում ազատությունից զրկված բոլոր հայերը պետք է անհապաղ ազատ արձակվեն»,- Հանրային ռադիոյի «Առանց տողատակի» հաղորդման շրջանակում նշել է Մարդու իրավունքների պաշտպան Անահիտ Մանասյանը։ 

 
Զրույցում Մանասյանը շեշտել է, որ թեմային անդրադարձել է մշտապես՝ սեփական նախաձեռնությամբ և առանց դիմումների, ու շարունակելու է բարձրաձայնել հարցը հրապարակային և ոչ հրապարակային գործիքներով։ Անդրադառնալով Ռուբեն Վարդանյանի` Ադրբեջան այցելելու վերաբերյալ հայտարարությանը ՝ Անահիտ Մանասյանը նշել է համանման այցերի նպատակի հստակեցման կարևորությունը՝ փաստելով, որ այլ պետության տարածքում ՄԻՊ-ի կողմից մշտադիտարկում իրականացնելն անհնար է։

ՄԻՊ անկախության վերաբերյալ նա ընդգծել է, որ հաստատության անկախությունը չի կարող պայմանավորվել քաղաքական դերակատարների նպատակների բավարարվածությամբ։ Ըստ Պաշտպանի՝ անկախության մասին խոսում են այն դերակատարները, ովքեր ժամանակին չեն կատարել միջազգային հանձնարարականները։ Նա նաև տեղեկացրել է, որ 2025 թվականին ՄԻՊ գործունեության արդյունավետությունը եղել է բարձր. պետական մարմինների կողմից կատարվել կամ մասնակի են կատարվել համակարգային առաջարկների շուրջ 70 տոկոսը։