Մթնոլորտային օդի որակի գնահատման նոր չափանիշներ կգործեն

Հայաստանի կառավարության որոշմամբ՝ 2027 թվականի նոյեմբերի 1-ից ուժի մեջ կմտնեն մթնոլորտային օդի որակի գնահատման նոր մեթոդաբանություններն ու չափանիշները։

Գործադիրը փոփոխություններ է իրականացրել մի շարք որոշումներում, որոնք բխում են 2025-2030 թվականների համալիր միջոցառումների ծրագրից։ Այդ ծրագրով նախատեսվում է արդիականացնել օդի որակի մոնիթորինգի համակարգը՝ ձեռք բերելով 14 անշարժ դիտակայան, որոնցից 6-ը տեղադրվելու են Երևանում։

Միջազգային չափանիշներին համապատասխանեցման նպատակով Շրջակա միջավայրի նախարարությանը 2025 թվականին արդեն հատկացվել է 300 միլիոն դրամ՝ երկու դիտակայան գնելու համար։ Այդ սարքավորումներն արդեն տեղադրվել են մայրաքաղաքի Կենտրոն վարչական շրջանում՝ Երվանդ Քոչար 6/1 հասցեում, և Քանաքեռ-Զեյթունի Դավիթ Անհաղթի զբոսայգում:

Ներկայում իրականացվում են սարքավորումների ստուգաճշտման և փորձարկման գործընթացները։ Դիտակայանների գործարկումը թույլ կտա իրական ժամանակում ստանալ տեղեկատվություն և ճշգրիտ չափել մթնոլորտի հիմնական աղտոտիչների մակարդակը։