ԵՄ-ում ներգաղթյալների թիվը հասել է ռեկորդային ցուցանիշի

ԵՄ-ում ներգաղթյալների քանակը 2025 թվականին կազմել է 64,2 միլիոն՝ սահմանելով պատմական առավելագույն ցուցանիշ։

Նախորդ տարվա համեմատ այս թիվն ավելացել է 2,1 միլիոնով։ Իրավիճակը զգալիորեն փոխվել է 2010 թվականից ի վեր, երբ Եվրամիության անդամ պետություններում բնակվում էր օտարերկրյա ծագում ունեցող շուրջ 40 միլիոն մարդ։

Ներկայում միգրանտների ամենամեծ կենտրոնացումը գրանցվել է Գերմանիայում, որտեղ նրանց թիվը հասնում է գրեթե 18 միլիոնի։ Այդուհանդերձ, աճի տեմպերով առաջատարը Իսպանիան է. այստեղ օտարերկրյա ծագմամբ բնակիչների թիվն աճել է մոտ 700 հազարով՝ ընդհանուր առմամբ կազմելով 9,5 միլիոն։

Բնակչության ընդհանուր թվաքանակում միգրանտների բարձր տեսակարար կշիռ է դիտվում նաև Կիպրոսում, Մալթայում և Լյուքսեմբուրգում։