ՏԵՍԱՆՅՈՒԹ. Աջակցելու ենք ընդդիմադիր առաջատար ուժի վարչապետի թեկնածուին. Արծվիկ Մինասյան

«Մենք գնում ենք շատ մեծ ձայն հավաքելու, ստանալու համոզումով, ակնկալիքով»,- այսօր լրագրողների հետ զրույցում ասաց «Հայաստան» խմբակցության պատգամավոր Արծվիկ Մինասյանը։ Նրա խոսքով եթե դա իրենց մոտ չհաջողվի, ապա ակնկալում են ընդդիմադիր դաշտի այնպիսի լայն համագործակցություն, որը թույլ կտա «այս իշխանություններին զրկելու վերարտադրվելու հնարավորությունից»:


Հարցին՝ դուք ունե՞ք ներքին պայմանավորվածություն, որ եթե երեք քաղաքական ուժերով անցնեք խորհրդարան, վարչապետի թեկնածու առաջադրվելու է Ռոբերտ Քոչարյանը և նրանք քվեարկելու են Ռոբերտ Քոչարյանի օգտին, Մինասյանը պատասխանեց․ «Ո՛չ, նման ո՛չ պայմանավորվածություն, ո՛չ քննարկում, ո՛չ զրույց չի եղել։ Ավելին ասեմ՝ նախագահ Քոչարյանը իր ասուլիսներից մեկի ժամանակ, եթե չեմ սխալվում, այդ մասին խոսել է և տրամաբանական բացատրություն է տրվել»: 


Նա շեշտեց, որ այն ընդդիմադիր ուժի վարչապետի թեկնածուն, որը կստանա առավել շատ ձայներ, կստանա իրենց աջակցությունը, և իրենք նույն մոտեցումն են ակնկալում մյուս ուժերից։