Փաշինյանը` կենսաթոշակների ինդեքսավորման մասին

ՀՀ վարչապետ Նիկոլ Փաշինյանը մանրամասնել է «Քաղաքացիական պայմանագիր» կուսակցության նախընտրական ծրագրի այն դրույթները, որոնք վերաբերում են 2026-2031 թվականների սոցիալական բարեփոխումներին։

Ապրիլի 22–ին վարչապետ Նիկոլ Փաշինյանը շարունակել է հանրությանը ծանոթացնել «Քաղաքացիական պայմանագիր» կուսակցության նախընտրական ծրագրին։ Սոցիալական ցանցի իր էջում նա ներկայացրել է 2026-2031 թվականների համար նախատեսված միջոցառումները, որոնք կիրականացվեն խորհրդարանական մեծամասնություն և Կառավարություն կազմելու դեպքում։

Ծրագրային առանցքային կետերից մեկը կենսաթոշակների ինդեքսավորումն է, որի նպատակն է ապահովել, որ միջին փաստացի կենսաթոշակը ցածր չլինի նվազագույն սպառողական զամբյուղից։

«Բարեբախտաբար, մեզ մոտ հիմա միջին կենսաթոշակը գերազանցում է սպառողական զամբյուղը և սա պատմական նորություն է, պատմական փոփոխություն է Հայաստանում սոցիալական ապահովության բնագավառում։ Մենք նախորդիվ նվազագույն կենսաթոշակը համապատասխանեցրինք նվազագույն պարենային զամբյուղին, որը նշանակում էր, որ թոշակառուն պետք է իր մեկ ամսվա անհրաժեշտ մինիմալ կալորիան ապահովեր, և հիմա, մի քանի տարի անց, ներառյալ կենսաթոշակի հետվճարի համակարգը, մենք միջին կենսաթոշակը բարձր ենք պահում երբեմն 10 տոկոսով նվազագույն սպառողական զամբյուղից։ Մենք 2028-ից սկսած կենսաթոշակները կինդենքսավորենք այնպես, որ կենսաթոշակն այլևս Հայաստանում նվազագույն սպառողական զամբյուղից ցածր չի լինի»,- նշել է վարչապետը։

Նիկոլ Փաշինյանը նաև անդրադարձել է իր նախկին հայտարարությանը, ըստ որի թոշակառուները կարող են կենսաթոշակի 10 հազար դրամ հավելման հաշվին տոմս գնել և մեկնել Լառնակա։ Նա պարզաբանել է, որ դա իրագործելի է, քանի որ առողջապահական ապահովագրության ներդրման շնորհիվ թոշակառուները խնայում են դեղորայքի համար նախատեսված գումարը, որը միջինում կազմում է շուրջ 30 հազար դրամ։