Նախընտրական շրջանի հետ կապ չունի. Բաղդասարյանի հայտարարությունը

Վարչապետի մամուլի քարտուղարը մեկնաբանել է Հայաստանում հիբրիդային սպառնալիքների դեմ ուղղված ԵՄ նոր քաղաքացիական առաքելության հաստատումը։

Ապատեղեկատվական արշավների դեմ Կառավարության իրականացրած ուսումնասիրություններին նվիրված ասուլիսում Նազելի Բաղդասարյանը խոսել է ԵՄ արտաքին հարաբերությունների խորհրդի որոշման մասին, որով Հայաստանում նոր քաղաքացիական առաքելություն է տեղակայվելու։

Անդրադառնալով հարցին, թե ինչ գործիքակազմ է կիրառվելու նախընտրական փուլում ապատեղեկատվությանը հակազդելու համար և արդյոք դրանք տրամադրվելու են ԶԼՄ-ներին, թե պետական գերատեսչություններին, մամուլի քարտուղարը նշել է, որ խոսքը քաղաքացիական տեղակայման մասին է, որի ժամկետների վերաբերյալ տեղեկատվություն արդեն եղել է։

«ԱԳՆ-ն նախօրեին այս թեման կոմունիկացրել է, և դա բնավ նախընտրական շրջանի հետ կապ չունի, քանի որ 2 տարի ժամկետով են տեղակայվելու։ Ուզում եմ, որ այս տեղակայումը որևէ կերպ չկապվի արագ արձագանքման խմբի հետ, որը նույնպես այս շրջանում ակտիվ է եղել։ Ուզում եմ ասել, որ երկու առանձին գործառույթներ են, և այս դեպքում 2 տարի ժամկետով է։ Գործողությունների մասին, համագործակցության, ինչու չէ, նաև լրատվամիջոցների հետ աշխատանքի մասով կտեղեկացնենք։ Նպատակը մեկն է՝ տեղեկատվական դիմակայունությունը բարձրացնել, այդ թվում՝ հիբրիդային սպառնալիքների դեմ»,- ասել է նա։