Կատարյալ խայտառակություն. Զախարովան հայտարարություն է տարածել

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ իրանական «Բուշեր» ատոմակայանը խաղաղ օբյեկտ է, և այն համակենտրոնացման ճամբարների հետ համեմատելն անընդունելի է։

Զախարովան նշել է, որ «Բուշերը» համակենտրոնացման ճամբարների հետ համեմատելը կամ նմանատիպ զուգահեռներ տանելը բացարձակապես անթույլատրելի է և կատարյալ խայտառակություն։ Ըստ նրա՝ «Ռոսատոմի» աշխատակիցները կայանում գործել են բարձր պրոֆեսիոնալիզմով՝ գիտակցելով, որ աշխատում են խաղաղ օբյեկտում։ Նա ընդգծել է, որ այս կայանը, ինչպես «Ռոսատոմի» մյուս նախագծերը, չունի «երկակի կամ եռակի հատակ» և տարածաշրջանին հնարավորություն է տալիս խաղաղ պայմաններում զարգացնել տնտեսությունն ու արդյունաբերությունը՝ ստանալով ատոմային էներգիա։

Զախարովան հավելել է նաև, որ նմանօրինակ համեմատությունները նենգափոխում են հասկացությունները, աղավաղում պատմական իրողությունները և անհարգալից վերաբերմունք են Երկրորդ համաշխարհային պատերազմի բոլոր զոհերի հիշատակի նկատմամբ։