Իրանը ԱՄՆ-ից չի խնդրել երկարաձգել հրադադարի ռեժիմը. Tasnim

Իրանը չի ներկայացրել հրադադարի երկարաձգման խնդրանք Վաշինգտոնին, հայտնում է Tasnim գործակալությունը։ Իրանական պետական հեռուստատեսության (IRIB) տվյալներով՝ Իրանի Իսլամական Հանրապետությունը չի ընդունում ամերիկյան կողմի գործողությունները։

«Թեհրանը չի ճանաչում Թրամփի հայտարարած հրադադարը, լիակատար իրավունք ունի չպահպանել այն և կգործի իր ազգային շահերին համապատասխան»,- նշված է IRIB-ի հաղորդագրության մեջ։

Ըստ Tasnim-ի հրապարակման՝ Իրանի իշխանությունները Վաշինգտոնի քայլը դիտարկում են կամ որպես ԱՄՆ-ի պարտություն, կամ որպես խաբեություն՝ երկրի վրա հերթական հարձակումը նախապատրաստելու համար։

Հաղորդվում է նաև, որ Թեհրանը չի պատրաստվում բացել Հորմուզի նեղուցը, քանի դեռ Միացյալ Նահանգները շարունակում է ծովային շրջափակումը։ Գործակալությունը հավելում է, որ անհրաժեշտության պարագայում Իրանը ուժի կիրառմամբ կճեղքի շրջափակումը։

Ավելի վաղ՝ ապրիլի 21-ի երեկոյան, ԱՄՆ նախագահ Դոնալդ Թրամփը հայտարարել էր հրադադարի ռեժիմը մինչև բանակցությունների ավարտը երկարաձգելու որոշման մասին։ Նա պարզաբանել էր, որ նման խնդրանքով իրեն դիմել են Պակիստանի ներկայացուցիչները։