ՀԷՑ-ը կարող է ճանաչվել հանրային գերակա շահ. Ռոմանոս Պետրոսյան

ՀԷՑ-ի ժամանակավոր կառավարիչ Ռոմանոս Պետրոսյանը հայտնել է, որ մինչև մայիսի 25-ը բաժնետոմսերի փոխանցման գործարքի չկայացման դեպքում ընկերությունը կարող է ճանաչվել հանրային գերակա շահ։

ՀԾԿՀ-ում լրագրողների հետ ունեցած զրույցի ընթացքում ՀԷՑ-ի ժամանակավոր կառավարիչ Ռոմանոս Պետրոսյանը պարզաբանել է, որ իր պաշտոնավարումը ենթադրում է ընկերության պետականացման գործընթացի լիարժեք ավարտ, ինչը դեռ մի քանի ամիս կտևի։ Նրա խոսքով՝ եթե մինչև մայիսի 25-ը բաժնետոմսերի փոխանցման գործարք չիրականացվի, կսկսվի նոր փուլ, որի շրջանակում Կառավարության որոշմամբ ՀԷՑ-ը կճանաչվի հանրային գերակա շահ։

Ռոմանոս Պետրոսյանը նաև ընդգծել է, որ իր լիազորությունները կդադարեն միայն այն ժամանակ, երբ գործընթացն ամբողջությամբ եզրափակվի և ՀԷՑ-ը ստանա նոր լիցենզիա։ Նա հավելել է, որ այս պահին առկա է վարչական դատարանի որոշում, որը ՏԿԵՆ-ին պարտադրում է մինչև մայիսի 25-ը զերծ մնալ պետականացման գործողություններից։

Հիշեցնենք, որ 2026 թվականի մարտի 11-ին ընկերությունը դատական հայց է ներկայացրել ընդդեմ ՀՀ կառավարության։ Հայցվորը պահանջում է հաստատել իր իրավունքը՝ մինչև 2026 թվականի մայիսի 25-ը Կառավարության հետ համաձայնեցված կարգով վաճառել ՀԷՑ-ում ունեցած սեփական 70% բաժնեմասը։ Դատարանը մասնակիորեն բավարարել է միջնորդությունը՝ ժամանակավորապես ճանաչելով նշված բաժնեմասը համաձայնեցված ընթացակարգով օտարելու հնարավորությունը։