ՀԷՑ-ի միացման սակագները և վճարներն էականորեն կնվազեն. որոշումն ընդունվեց

Հանրային ծառայությունները կարգավորող հանձնաժողովը որոշում է կայացրել նվազեցնել ՀԷՑ-ի նոր բաժանորդ դառնալու սակագներն ու հզորությունների ավելացման վճարները։

ՀԷՑ ժամանակավոր կառավարիչ Ռոմանոս Պետրոսյանը տեղեկացրել է, որ ՀՀ հանրային ծառայությունները կարգավորող հանձնաժողովն այսօրվա նիստում ընդունել է նոր որոշում։ Ըստ այդմ՝ ֆիզիկական և իրավաբանական անձանց համար ՀԷՑ-ի նոր բաժանորդ դառնալու (սպառման էներգահամակարգը բաշխման ցանցին միացնելու) սակագները կնվազեն մինչև 40%-ով։ Միաժամանակ, էլեկտրաէներգիայի հզորությունների ավելացման կամ նոր հզորությունների միացման համար նախատեսված վճարները կկրճատվեն մինչև 55%-ով։

Սահմանված որոշումն ուժի մեջ է մտնելու հրապարակմանը հաջորդող օրվանից, որը ենթադրաբար լինելու է վաղը։ Ռոմանոս Պետրոսյանը շնորհակալություն է հայտնել ՀԾԿՀ-ին և ՀԷՑ-ի ամբողջ անձնակազմին՝ այս քաղաքացիակենտրոն բարեփոխման համար՝ շնորհավորելով բոլորին և հավելելով, որ ՀԷՑ-ն այլևս ծառայում է ժողովրդին։