ԿԸՀ-ի պարզաբանումը՝ «Ուժեղ Հայաստան Սամվել Կարապետյանի հետ» կուսակցության վերաբերյալ

ՀՀ կենտրոնական ընտրական հանձնաժողովը նիստի ժամանակ անդրադարձել է «Ուժեղ Հայաստան Սամվել Կարապետյանի հետ» դաշինքի լիազորված անձի դիմումին և ներկայացրել համապատասխան պարզաբանումներ։

ՀՀ ԿԸՀ-ն ապրիլի 22-ի նիստում քննարկել է Գոհար Մելոյանի դիմումը, որով վերջինս պարզաբանում էր ակնկալում «Ուժեղ Հայաստան Սամվել Կարապետյանի հետ» կուսակցությունների դաշինքի ձևավորման համար ստացված օգտահաշվի անվան և Ընտրական օրենսգրքի վերջին փոփոխությունների վերաբերյալ։ 

Ըստ հանձնաժողովի պարզաբանման՝ 2026 թվականի հունիսի 7-ին կայանալիք Ազգային ժողովի ընտրություններում կուսակցությունների ու դաշինքների առաջադրման և գրանցման գործընթացում կիրառվելու են 2026 թվականի ապրիլի 7-ին ընդունված օրենսդրական լրացումներն ու փոփոխությունները։

ԿԸՀ-ն արձանագրել է, որ մինչև 2026 թվականի ապրիլի 7-ը հանձնաժողովը չի անդրադարձել որևէ ուժի իրավասուբյեկտության կամ անվանման խնդրին, քանի որ այդ ժամանակահատվածի համար չի ունեցել նման լիազորություն։ Միաժամանակ հայտնվում է, որ կառույցը բավարարել է նույն սուբյեկտի ներկայացրած՝ օգտահաշվի անվան փոփոխության դիմումը։ Արդյունքում դաշինքի օգտահաշվի անվանումն այսուհետ «Ուժեղ Հայաստան» է։