FIDE-ն անդրադարձել է գրոսմայստեր Սմբատ Լպուտյանի ձերբակալմանը

Շախմատի միջազգային ֆեդերացիան (FIDE) հաղորդագրություն է տարածել գրոսմայստեր Սմբատ Լպուտյանի ձերբակալության վերաբերյալ։

Իրավապաշտպան Ռուբեն Մելիքյանը տեղեկացրել է, որ FIDE-ն հանդես է եկել հայտարարությամբ՝ կապված գրոսմայստեր Սմբատ Լպուտյանի ձերբակալման հետ։ Տարածված հաղորդագրության մեջ մասնավորապես շեշտվում է Մանկավարժական համալսարանում գործող «Շախմատի գիտահետազոտական կենտրոնի» դերն ու նշանակությունը։

Մեջբերված տեքստում նշվում է. «ցանկանում ենք առանձին նշել, որ Շախմատի գիտահետազոտական կենտրոնի գործունեությունը վաղուց կարևոր նշանակություն ունի շախմատային գիտության զարգացման և FIDE-ի կրթական ծրագրերի համար։ Սա հատկապես կարևոր է՝ հաշվի առնելով, որ «Շախմատը դպրոցներում» ծրագիրն ընթացիկ տարում FIDE-ի գործունեության առաջնահերթ ուղղություններից մեկն է»։

Հիշեցնենք` Հակակոռուպցիոն կոմիտեում քննվող քրեական գործով ձերբակալվել են մանկավարժական համալսարանի պրոռեկտոր Մարիամ Իսպիրյանը, նրա որդին, Շախմատի ֆեդերացիայի փոխնախագահ, Մանկավարժական համալսարանի Շախմատի և սպորտի ամբիոնի վարիչ, «Շախմատ» գիտահետազոտական ինստիտուտի տնօրեն Սմբատ Լպուտյանը։